Mi on bèl montaj a diskou a ansyen prézidan a répiblik fwansé. Montaj-la tèlman byen fèt i ka ban nou an réyalité vré fon a-yo, kivédi on fon a kolonyalis. Yo ba sé péyi afwiken-la lendépandans mé yo ka toujou koupé é haché adan yo. Ki prézidan fwansé a yè, ki prézidan fwansé a jòdi é ki prézidan a fwansé dèmen, sé ké menm lèspri néokolonyal-la. On lèspri néolokolonyal yo pwan an Afwik pou yo chayé-y an Karayib-la osi! Wi mésyé, adan pa lontan, nou ké ni on gouvèlman gwadloupéyen mé sé fwansé ké ralé kòd-la. Sitou sé labann a Lirèl é Gillot.

Gadé é kouté sa kanmarad!

Réfòm téritoryal a fwansé ka vini, Gwadloup ki sé koloni a-yo ka éséyé pòté mannèv pou touvé on èstati poliyik ba-y. An vant a bèt-la menm nou ni on réjyon ka éséyé pwan douvan. Wi an réjyon Alsace, yo bizwen fè fizyon pou ba sa yo ka kriyé on "conseil unique d'alsace". Mé adan sé politisyen-la yo tout pa dakò asi métòd-la. Kouté!

Moun ka voyé labou asi prézidan a kongré a Kanaky-Nouvèl- Kalédoni misyé Roch Wamytan pas i té ay vwè prézidan a péyi Fidji an péyi a-y. Misyé Harold Martin prézidan a gouvèlman a Kanaky- Nouvèl-Kalédoni ni rézon a-y lè i ka di péyi Kanaky an péyi Fidji, sa ka rantré adan konpétans ww a péyi-la. Kopérasyon réjyonal, diplomasi réjyonal, Kanaky ni tout plas a-y adan. Sé kon sidiré misyé Jacques Gillot té ké ay vwè Raoul Castro Kiba. Moun té ké wouklé mé sa ka rantré adan konpétans a péyi Gwadloup. An plis di sa, misyé Harold Martin déklaré Roch Wamytan vin an péyi-lasa pou fè prézidan fidjyen-la chanjé mannyè a-y é rantré adan ladémokrasi. E piplis, fò pa pèp Fidji pwan gaz adan sa. Zò ké kouté tou sa adan vidéo-la an mété ba zòt la.

Pannan patriyòt a FPAC* kay fasadé èvè pèp Gwadloup adan diféran latilyé pou éséyé bokanté èstati politik a péyi-la plas, an kay ba zòt vwè on vidéo ola misyé Charles Pidjot on endépandantis kanak a "l'Union Calédonienne" ka fasadé èvè jenn a péyi Kanaky adan on émisyon télé. Sété an lanné 2010. Kouté sa!

* "Forces Patriotiques Anti-capiatalistes et anti Colonialistes" ka lyanné UPLG, FKNG, COPAGUA, CIPPA, PCG.

Charles Pidjot

Omoman Lirèl é Gillot oblijé woulé (???) asi on pwojé gwadloupéyen a sosyété, omoman patriyòt a AFPAC * ka sòti on pwojé ki pli sèryé, ban fè zòt rafréchi mémwa a-zòt.

Sété on jou 21 févriyé 2009 ola dé fwansé jacques marseille é jacques julliard té ka di léta fwansé pé pa ankò èvè sé dènyé koloni a-y la.

*Assises des Forces patriotiques Anticolonialistes  Anticapitalistes.