Adan gouvèlman a sosyalis fwansé, yo fouté twa moun ki sòti adan koloni a-yo. On pati a gwadloupéyen kontan pas yo ka konpwann yo kay gannyé plis égalité èvè manman-yo ki sé péyi Fwans. Mwen an ka di, sé ankò on fwa on kalkil politik a léta néo-kolonyal fwansé! Apré zafè a gwadloupéyenn mis Fwans, apré zafè a gwadloupéyen ka pòté tit é méday ba fwansé, apré zafè a on fanm Gwadloup kay pòté drapo a fwansé adan jé olenpik-la ka vini la, mi yo ka woumèt on pil pou ba pèp-la landòmi èvè zafè a minis. Fwansé sav Gwadloup sé koloni ki tini plis "siklòn" sosyal é politik alò pou anpéché pèp-la rèvandiké souvrènté a péyi a-y, i ka bay bonbon pou i sousé mé sé bonbon-lasa tini dwòg adan-yo. Nou sav dwòg ka ba pèp landòmi!

Touléjou lè ou ka pasé anlè pon oben ankò anba pon an péyi Gwadloup, ou ka vwè jandam sanblé la. Poukisa? Pou pwotéjé byen a béké é éwopéyen an péyi-la! Padavwa LKP déklaré i ké fè on gériya sosyal!  Lòtjou, gwadloupéyen té an pwoblèm èvè tout pakèt a dlo-la ki té tonbé, nou pa jen vwè yo pou pòté moun soukou. Zò ka tou konpwann, machandiz a sé mésyé pli fondal ki vi a nèg an péyi-la! Sé ponpyé gwadloupéyen (SDIS) ki pòté pèp-la soukou. Sa ka byen pwouvé nou pou sa ki poko konpwann, sé blan-la isidan pou sové bannélo a-yo é byen a-yo, yo pa la pou sové nèg! Gwadloup sé on koloni, nou pé ké jen las répété sa! Alò i ja lè pou nou fouté sé kalté chyen pwofitan-lasa déwò é nou pwan péyi an-nou ki tan-nou!

 Sèmi-maraton entènasyonal Zabim 2012

1. Lerdan Kantu Wanjiku (Kénya) 21,400 km an 1nè 06'18""

2. Salim Saremo (Kénya) 1nè 06'20"

3. Jean Habarvrema (Bouwoundi) 1nè 07'03"

12. Eddy Boulate (Gwadloup) 1nè 15'32"

Chanpyona baskèt Antiy-Giyàn 2012 Matnik

 EDO (Gwadloup) - ASC Tours (Giyàn) 78-58

EDO (Gwadloup) - Golden Star (Matnik) 77-70

Golden Star (Matnik) - ASC Tours (Giyàn) 69-47

Klasman-la

1. EDO

2. Golden Star

3. ASC Tours

* EDO chanpyon Antiy-Giyàn 2012

Lendi oswè, lapli si lapli mété-y ka tonbé adan péyi-la. Lamétéo déklaré 300 mm dlo tonbé! Yo di sa ka rivé on fwa adan on syèk. An pé di zòt, sé prèmyé fwa an vwè tousa lapli tonbé an péyi-la.