Milyé, milyé moun manifèsté Barcelona pou lendépandans

a Katalòn.

Pannan nèg-la an Gwadloup vlé rété anba grenn a fwansé-la, pannan on dòt nèg vlé blan wouvin kolonizé péyi a-y Lèkamroun (blog a on ti-misyé yo ka kriyé Jean-Pierre Bekolo), an Katalòn, pèp-la ka anvizajé séryèzman trapé lendépandans a-y! Wi, dèmen dimanch, kay ni élèksyon antisipé a dépité a parlèman a réjyon otonòm a Katalòn an Èspagn. E la, nou ké vwè chif a moun ki vlé lendépandans a Katalòn. Jou 11 sèktanm pasé, milyé, milyé moun manifèsté Barcelona pou lendépandans a Katalòn. Ès nou ké vwè sa on jou Gwadloup? Yo fouté nèg-la tèlman adan lamandisité, adan lanonrèsponsabilité!

Lè sé pou jwé lakoup di mond, fò'w mandé mèt-la lotorizasyon!

Lè sé pou lyanné èvè Domnik, fò'w mandé mèt-la lotorizasyon!

Lè sé pou achté pétwòl a Vénézwèla, fò'w mandé mèt-la lotorizasyon!

Ki moun é ki péyi an ka palé la?

Yè aprémidi-la, an té ka apwann Man Borèl Lincertin kay akonpagné prézidan a Répiblik fwansé François Hollande adan 14èm sanblé a sa yo kriyé "la francophonie". On sanblé ki kay fèt an bout a simenn-la an vil Kinshasa an péyi Répiblik Démokratik Kongo.

Alò an ka mandé-mwen :"Ka Lagwadloup ka vin chèché adan on sanblé a péyi endépandan?". E sé la an chonjé sa an toujou maké ba pèp an mwen asi nèt-la. Politisyen an-nou kay fè staj a chèf déta a-yo an péyi déwò. Zò té ni Lirèl ki té Sendomeng pou envèstiti a prézidan a péyi-lasa. Konm alè-la, Lirèl okipé pas i minis a fwansé, sé man Borel Lincertin ka fè staj-la an plas a-y. Man Lincertin jis di i kay rèprézanté Lagwadloup adan sanblé-lasa, sé pou di zòt!

Gwadloupéyen chonjé sa an toujou di zòt, gwadloupéyen ké lévé on jou maten péyi a-yo endépandan èvè bwabwa politisyen an tèt a péyi-la. Sé sa mwen kriyé "Lafwansafwik adan Karayib-la".

Lòtjou, an té ka gadé on jounal Senmawten é an dékouvè on biten an pa té konnèt. On péyi pa oblijé endépandan pou'y vin manb a UNESCO. E sé kon sa an vwè Kiraso é Sintmawtin dé péyi otonòm ki adan rwayòm a Laoland ki rantré UNESCO lanné pasé.

Omoman ola gwadloupéyen vlé fè gwoka rantré UNESCO, omoman on déba ka fèt asi dosyé-lasa, yo té ké pwofité pou fè péyi Gwadloup rantré UNESCO. Kon sa a pa Lafwans ki té ké fè gwoka an-nou rantré UNESCO mé péyi Gwadloup!

UNESCO

Zò tini 195 péyi manb é 8 péyi ki manb asosyé. A ki yo?

- Awouba (Oland)

- Kiraso (Oland)

- Zil Kayiman (Anglètè)

- Zil Féwoé (Dànmak)

- Zil Vyèj Anglé (Anglètè)

- Makao (Chin)

- Sintmawtin (Oland)

- Tokélaou (Nouvèl Zéland)

Si zò pa konnèt ka sa vlé di, jété on zyé asi dokiman-la an mété ba zòt la. Pawòl kout!