Gwadloupéyenn, gwadloupéyen

Gwadloup an danjé

Nou pé pa rété kon sa

Fò nou mèt tout fòs an-nou

Adan on sel konba pou nou rézisté

Dè jou an jou lènmi ka anvahi nou

Fò nou fè atansyon tan ka pasé

Gwadloupéyenn, gwadloupéyen

Nou tout ka doubout

Tout ansanm pou nou pé

Sové péyi-la é gannyé libèté an-nou

Sové péyi-la é gannyé libèté an-nou

E gannyé libèté an-nou

Lagwadloup sé tan-nou

Lagwadloup sé pa ta yo

Yo pé ké fè sa yo vlé

Adan péyi an-nou

Larmé kolonyal fwansé

arèsté Laurent Gbagbo

prézidan a Kòtdivwa

jòdi lendi!

Jòd-la sè é fwè Gwadloup, an ka apwann léta kolonyal fwansé mèt lapat asi Laurent Gbagbo, prézidan nòmalman a on péyi souvren. A pa sarkozy prézidan a fwansé ki té déklaré on jou, zafè a Fwansafwik sa fini? Nou ka konstaté jòd-la a pa vré! Kòtdivwa pa on péyi endépandan sé on téritwa outrèmè fwansé!

Sa ka fan pli chyé la, sé vwè LONI an konplosité èvè fwansé!

Modòd a-yo : lendépandans ba péyi Gwadloup!

Adan kongré a LiGTG é ta FKNG ki bout simenn pasé, militan a-yo mété adan rézolisyon a-yo, lendépandans é souvrènté ba péyi Gwadloup!

Lendépandans a pa lè ou ka viv tousèl a-w! Lendépandans sé lyanné-w èvè dòt péyi (rélasyon ékonomik, diplomatik...)! Lendépandans, sé pòté solidarité ba dòt péyi, sé osi wousivwè solidarité a dòt péyi padavwa sa ka rivé vou pé rivé vwazen a-w osi!

Kouté an midi-la é oswè-la adan jounal a RTB, déklarasyon final a sèkrétè jénéral a LiGTG é pòt-pawòl a LKP, kanmarad Eli Domota. Sa fò, fò, fò! Sé yonn adan pli bèl déklarasyon kanmarad-la ja voyé!

FKNG li kant a-y anbout a kongré a-y, désidé on kréyasyon a on drapo Gwadloup èvè tout sé òganizasyon patriyotik é èvè pèp Gwadloup!

Roch Wamytan é Oscar Temaru kay menné péyi

a-yo asi chimen a lalibèté?

Listwa pa ka fè dèyè é an ka èspéré sé douvan i kay. Dé endépandantis pwan pwès an menm moman-la tèt a péyi a-yo an Kanaky é an Polinézi. Roch Wamytan (UC-FLNKS) pou Kanaky é Oscar Temaru (UPLD) pou Polinézi. On bèl nouvèl toubòlman! Mé an ka èspéré sé dé gwan nonm-lasa pé ké lésé fwansé pyéjé yo kon yo té pyéjé misyé Alfred Marie-Jeanne Matnik. Pawti a Marie-Jeanne (MIM) rété 12 lanné an tèt a réjyon Matnik é péyi-lasa, pa menm lotonòmi i pwan. Pétèt asi Letchimy, Matnik ké vin otonòm mé biten-lasa dwèt ké fèt an dé tan. Awtik 73-la avan é apré ta 74-la.

Èvè mésyé Wamytan é Temaru, ès Kanaky é Polinézi ké pwan chimen a lémansipasyon? Nou ké la pou nou vwè!

Jean-Marie Hubert (UPLG), José Toribio (PSG)  é Chantal Lérus (FRAPP)

kochi bèk a moun a Lirèl yè swa!

Dézyèm tou a kantonal an péyi an-nou bout é moun a Lirèl pa rivé pèsé. Yo tout pèd douvan rèprézantan a sa yo kriyé "La gauche alternative". Pèp-la komansé konpwann! I komansé konpwann davwa i sav fò pa nou pèp Gwadloup konté asi moun ka gadé enki manda a-yo! On bèl biten pou divini a péyi-la. Nou ka èspéré pèp-la ké konpwann sé adan chimen a lémansipasyon péyi-la ké vwè douvan-y. Konba dèyè poko mannyé!