Pa manké asi "Guadeloupe 1ère" omaj-la Bworlconnection kay rann gwan awtis an-nou PSE ki lésé nou lanné pasé.

Sé on sèl chiraj pou gwoka!

Dèpi misyé Félix Cotellon a Sant Rèpriz té désidé vwè si UNESCO ka mété gwoka kon patrimwàn imatéryèl a limanité, tini déotwa gwadloupéyen ki lévé gawoulé kont biten-lasa. E sé kon sa sanmdi maten asi RTB, Luidji té ni an èstidyo-la, twa gwadloupéyen Jean-Claude Nelson, Marie-Line Dahomay é Fritz Nafer ki déklaré yo pa dakò padavwa yo pè étranjé pati èvè mizik an-nou. Moun a Sant Rèpriz pwan téléfòn-la pou yo té réponn yo. On sèl chiraj pou mizik an-nou ki sé gwoka! Yè dimanch, toujou asi RTB, misyé Frantz Succab di fò gwadloupéyen arété goumé pou zafè a gwoka. I di osi fò sé moun-la ka défann gwoka-la, mèt anwout pou libéré péyi a-yo osi!

An dakò èvè Succab!

Yè sanmdi an té ka kouté kon a labitid émisyon a misyé Wojé "An nou gadé pli lwen". E an bout a émsiyon a-y la, i té ka palé asi zafè a bank ola sé moun rich-la té ka séré lajan a-yo pou yo pa péyé enpo. Vou ki ja pa ni, sé vou pou péyé mé a pa sé moun a lajan-la! E pou ilistré sa, Wojé pasé on son onlo moun té enmé an péyi Gwadloup é an péyi déwò osi. On son an dansé onlo asi-y lè an té an vant a bèt-la. On awtis ki sòti an péyi Kongo é ki malérèzman ja lésé nou ; sété an lanné 1996-la. Non a-y Pamelo Mounk'a. Non a son-la an fwansé "L'argent appelle l'argent".

Mèsi Wojé pou son-la! Sa ka fè mwen chonjé lèbon tan! An menm balan-la, ban fè zòt partajé-y osi èvè zòt! E an senten onlo adan zòt konnèt li!

 L'argent appelle l'argent

Mbongo ekobenga Mbongo

L'argent appelle l'argent

Mbongo ekobenga Mbongo

Pwès tout pèp asi latè ka kriyé anmwé padavwa gwo machin-la yo hélé kapitalizm-la ka watibwazé tout koté. Menm aka éwopéyen! Moun jòdi ka sòti an lari pou pwofitasyon fè dèyè kaz. An anglé é an fwansé, yo ka kriyé sa "exploitation" mé nou ka kriyé sa "pwofitasyon" ki pli fò ankò.

Alò sa fè mwen chonjé yonn adan sé pli gwan chantè-la Ayiti ja pòté. On chanté ki malérèzman ja kité nou (jou 13 mé 1985). Non a-y  Antoine Rossini Jean-Baptiste toutmoun konnèt asi non a Ti-manno.

Gadé é kouté-y èvè gwoup a-y Gemini All Star ka lyanné èvè pèp a-y an péyi Ayiti. Ti-Manno, on  awtis militan ka manké nonsèlman Ayiti mé tout péyi nèg asi latè!

 Èspwatasyon sé sa ki kòz tout pitit mouri soufri

Pandan ke sa'k rich ap vin plu rich

Egalité, fwatènité, sé sa pou nou  òbsèvé

Pou lavil  fè youn sèl ak lakanpay

(Ti-manno)

A pa sa ka kontinyé fèt jòdi-jou? 

(1926 - 1991)                                               On èstati a-y an Polòn

28 sèktanm 1991 - 28 sektanm 2011, ja ka fè 20 lanné yonn adan sé pli gwan jazmenn-la lagé nou. Non a-y Miles Dewey Davis III. On gwan jwè twonpèt ki té ja ni lokazyon vini dé fwa an péyi an-nou Gwadloup. Miles Davis sété on boug ki pa té jen las chèché nouvon son.

Ni on biten té rivé-y an péyi a-y Etazini. On manblo blan té bay kou padavwa manblo-lasa pa té vlé nèg douvan sal dè konsèr-la. Miles Davis té di-y i té tèt dafich adan konsèr-lasa é magré sa manblo-la pa kwè-y. Sété an tan ola yo té ka pann nèg an pyébwa!

 "So what" (1964) :  Miles Davis (twonpèt) èvè John Coltrane (saksofòn).

"Tutu" (1986) : Miles Davis (twonpèt èvè soudin a-y), Marcus Miller (bas),

Kenny Garret (flit). Yo tou létwa ja vin an Gwadloup.

Alò? A pa mizik?