Vil Moindou mété déwò drapo a péyi Kanaky.

Sa fèt dèpi yè aprémidi! Wi mésyé, vil Moindou an péyi Kanaky lévé drapo a péyi-la asi fétay a lanméri a-y. Majorité a vil-la voté pou lévé drapo-lasa. Chonjé lè yo té désidé rann drapo-lasa ofisyèl, enki twa vil té rèfizé mété déwò drapo a Kanaky. Moindou, Foa éBourail.

Pouki biten sé twa vil-lasa té ka fè dèyè? Sé padavwa adan sé minisipalité-lasa, zò ka touvé fwansé ki kont drapo-lasa. Yo vlé enpozé ta-yo mé yo vlé pa vwè drapo a moun ki té la avan yo!

Mé dèpi yè Moindou fè-y!  Ka rété enki dé! Wi avan lanné-la bout, drapo a péyi Kanaky ké doubout adan tout komin a péyi-lasa!

Nou pé ké jen sòti adan sa?

An té ké konpwann sété prèmyé fwa, nou té ké alò maché adan sa. Mé sa ka fè 20, 30, 40 lanné sé vyé kalté zozyo-lasa ka vin an péyi an-nou é on pakèt moun isi ka maché adan pawòl a sé mésyé. Pou onlo nèg an péyi-la, bwana ké vin sové yo. Konmen tan sa ké kontinyé kon sa? Politisyen fwansé pa menm fouti réglé pwoblèm a kaz a-yo mé sé aka koloni yo ké chanjé on biten? E on pakèt zozyo kon sa ké défilé an péyi-la é nèg ké kontinyé valé pawòl a-yo! Blan-la, sé bondyé!

Adan sérémoni final a distribisyon a òska pou méyè dèstinasyon touristik, yo éli Lend méyè dèstinasyon. Adan sé nominé-la, ou té tini Bahamas, Kopènag (Dànmak), Doubay (Emira Arab Ini), Istanboul, Izmir, Antalya, Kusadasi (Tirki), Lisbòn (Pòtigal), Maldiv, Miami (Etazini), Changay (Chin), Èstokòlm (Syèd) é Sidné (Òstrali)

Jamayik li kant a-y yo éli-y méyè dèstinasyon a kwazyè mondyal é a lin dè myèl a mayé. Adan sé nominé-la, ou té tini Bawbad, LèKap (Afwik di Sid), Doubay, Fidji, Haway, Endonézi, Maldiv, Moris, New-York, Pari, Séchèl é Sentlisi.

Lotèl Casa de Campo an péyi Sendomeng yo éli-y méyè lotèl mondyal pou gòlf.

Maldiv, yo éli-y méyè dèstinasyon womantik asi latè.

Moris pé bat lèstomak a-y osi padavwa yo di péyi-lasa sé twazyèm lilèt touris préféré ay asi latè. Moris sé osi koté ou ka touvé pli bèl plaj asi planèt-la.

Ola Gwadloup é Matinik té yé? YO PA ADAN AYEN!

E wi mésyé, nou pa ka jwé an menm katégori ki yo! Gwadloup é Matinik, sé péyi endépandan? Awa pas sé dé péyi-lasa ka toujou atann si on "manman Fwans" pou pwan swen dè yo. E konm nou ni on manman ka okipé dè nou, alò nou pé pèwmèt-nou sali tout koté. Jété vyé loto, télévizyon, frigidè, machin a lavé adan fowè é plaj Gwadloup. E an 2009, nou té di péyi-la sé tan-nou! Alò si'y tan-nou, an nou okipé dè-y! Bawabd péyi endépandan dèpi 1966 ni sé kalté pwoblèm-lasa? Awa mésyé, moun adan péyi-lasa pa ka fè nenpòt ki biten. Si zò kay an kapital-la Bridgetown, sa nikèl! E wi, yo pa ni on manman Langlètè ka véyé si yo! Alò zò konpwann mas touris-la té'é débaké adan on péyi zò ka touvé zòdi tout koté? E zò vlé nou rantré adan klasman a ki biten?

E wi mésyé, menm chyen a-yo yo pa té'é fè sa! Zò di mériken vin libéré Lafganistan? E zò té ka kwè èvè Obama tout biten té ké bèl?

  Alò nou pli fwansé ki fwansé-la limenm? An pa'a konpwann! Kanmarad, an ka envité zòt ay jété on kout'zyé adan fès a bouk-la (Facebook yo ka di an anglé) é zò ké lyanné èvè "Drapeau Guyane". Zò ké vwè jan pèp Giyàn adòpté drapo a-yo!

An ja maké asi nèt-la, on drapo dwèt dépolitizé padavwa i ja fè twòp déga andidan péyi Gwadloup. E wi mésyé, jous a jòdi-jou, onlo moun an-nou ka kwè sé enki on drapo a endépandantis. Mwen, an vlé nou dépasé sa, fò drapo gwadloupéyen-la drapo a TOUT Pèp Gwadloup! On drapo dwèt dabò pou yonn rèprézanté kilti, lidantité, listwa, nanm a on pèp! Sé moun a taèkwondo-la ja konpwann sa é menm sé moun a surf-la! An Giyàn, an ka kwè onlo adan yo ja konpwann sa. An ka ba zòt on mòso adan sa an vwè (é sa zò pé vwè) adan facebook drapeau Guyane.

Mèt a sijé-la, misyé Michaël Malcom Alphonsine ka di :

"ATTENTION : Pour couper court à tout amalgame. Le drapeau guyanais n'est pas un drapeau indépendantiste (mwen an té'é maké "i pa sèlman on drapo endépandantis"). C'est le drapeau des guyanaises et des guyanais quelque soit leur opinion politique. C'est le drapeau de l'unification des guyanais de Sud, de l'Ouest, de l'Est, du Nord, de France et de partout dans le monde. Que notre diaspora soit unie!"

Misyé Krisyan Porthos ki sé on konséyé délégé a lakilti Giyàn ka di li kant a-y :

"Nous ne choisisons pas un drapeau pour poser des revendications d'indépendance. Nous choisissons un emblème culturel derrière lequel  nos compatriotes se regroupent . Assez souvent d'ailleurs, d'autres régions françaises ont un drapeau qu'elles utlisent au côté du drapeau "national"  (nasyonal fwansé, sé mwen ka maké-y).

Sa tèlman vré piskè 12 jou avan adòpsyon ofisyèl a drapo a-yo, pèp Giyàn té rèfizé plis lotonomi. Sa ka byen montré sé giyanè-la mété douvan kilti é lidantité a péyi-la plito yo mété politik-la.

E sé byen pou sa, an ka woudi pèp Gwadloup (é an menm balan-la pèp Matnik), fò nou DE-PO-LI-TI-ZE drapo nasyonal an-nou. Wi mésyé, adan kabèch an-nou, on drapo pa dwèt enki on drapo a endépandantis! Drapo-la dwèt drapo a pèp-la!

Pa ni lontan péyi Giyàn adòpté osi on imn nasyonal ki ta-y. Alò nou ké toujou rété dèyè kon talon?

" Show me the race or nation without a flag, i will show you a race of people without pride"  (Ban mwen vwè ras-la oben nasyon-la ki pa tini on drapo ki ta-y, an ké ba-w vwè on ras a moun ki pa tini fyèté).

Sé sa onorab Marcus Garvey té ka di an tan a-y!