"Saint-Vincent de paul" pa ka arété

maché an péyi-la!

Sèlon jounal "France-Antilles", 31 000 gwadloupéyen pa té ké manjé a fen a-yo! An plis adan jounal-la, yo ka palé dè gwadloupéyen ki ka woulé é ki poutan pé pa jwenn lédé bout! Sé sa yo ka kriyé travayè maléré. Sa ka soupwann zòt? Pa mwen padavwa sé sa an toujou di zòt asi nèt-la!

Touléjou lè ou ka pasé anlè pon oben ankò anba pon an péyi Gwadloup, ou ka vwè jandam sanblé la. Poukisa? Pou pwotéjé byen a béké é éwopéyen an péyi-la! Padavwa LKP déklaré i ké fè on gériya sosyal!  Lòtjou, gwadloupéyen té an pwoblèm èvè tout pakèt a dlo-la ki té tonbé, nou pa jen vwè yo pou pòté moun soukou. Zò ka tou konpwann, machandiz a sé mésyé pli fondal ki vi a nèg an péyi-la! Sé ponpyé gwadloupéyen (SDIS) ki pòté pèp-la soukou. Sa ka byen pwouvé nou pou sa ki poko konpwann, sé blan-la isidan pou sové bannélo a-yo é byen a-yo, yo pa la pou sové nèg! Gwadloup sé on koloni, nou pé ké jen las répété sa! Alò i ja lè pou nou fouté sé kalté chyen pwofitan-lasa déwò é nou pwan péyi an-nou ki tan-nou!

Lendi oswè, lapli si lapli mété-y ka tonbé adan péyi-la. Lamétéo déklaré 300 mm dlo tonbé! Yo di sa ka rivé on fwa adan on syèk. An pé di zòt, sé prèmyé fwa an vwè tousa lapli tonbé an péyi-la.

Lèlmi ka ri nou!

Apré divizyon ki rivé gwadloupéyen apré konfli a Gardèl, an pé konstaté 2009 ti-bwen lwen. Ki jan nou pé konpwann on mouvman ki lyanné gwadloupéyen ka touvé-y jòdi-la adan on féblès? 1é mé CGTG é CTU pa ka monté Marigalant èvè dòt òganizasyon sendikal. Adan konfli a Gardèl, UGTG é UPG, ouvriyé é plantè adan on divizyon. Tou sa ka fè jé a lèlmi ka ri nou.

10 mé ka vini la, pou manifèstasyon-la Lapwent, nou ké toujou ni inité-la? Sé an manman kèsyon an ka mandé-mwen. Nou ké la pou nou vwè. Sitou aprédavwa fwansé chanjé prézidan a-yo adan tèt a léta a-yo.

Grèv-la adan lizin a sik Gardel Moul ka montré plis ki janmen Gwadloup konstwi asi dé modèl. On sistenm a plantasyon é on dòt sistenm plis ki janmen kolonyal.

Wi, nou pé di sa! Nou tini dé lèlmi an péyi Gwadloup : sé béké-la é sé kolon fwansé-la!