Mi on bèl biten pou kè a-zòt! Sa té pasé an Bèljik an 2008 an ka kwè! Bèljik, Fwans, Otrich, brèf kon nou ka di, a kaz a-yo chyen ka fè chat!

Mèsi Bondamanjak!

Gwadloupéyen vin fengnan, sa pa posib! Dimanch kon tout gwadloupéyen, an ay menné déklarasyon a enpo Mòn "Caruel" Zabim. Lè an rivé douvan rantré a mòn-la, an vwè yo mèt dé pano a sans entèwdi. Ka an fè? An touné asi wonpwen "Raizet" pou mwen woutouné kon si an té kay Lapwent é an garé loto an-mwen owa la sé moun-la ka atann kaw pou yo ay Lapwent. An travèsé wout nasyonal-la, an lonji KFC-la é an monté mòn-la. An ka di zòt, antrè pyé a mòn-la é douvan bik a enpo-la, tini a penn 200 mèt. Ki jan gwadloupéyen pé pa menm fouti fè 200 mèt a pyé ankò? Tini gwadloupéyen ka fè-y mé tout rèstan-la, yo ka monté mòn-la an loto magré yo mèt dé pano a sans entèwdi douvan rantré a mòn-la."Fwansmanti" té jous oblijé bay on kout'jounal asi sa! Wè, gwadloupéyen vin fengnan menm! Sé pou sa an ka di lendépandans ké fè nou byen menm! Prèmyé lanné nou ké pwan gaz mé apré nou ké oblijé woulévé tèt an-nou! Lè on fanm ka mèt on ti-moun si tè, i pa ka soufè avan? Mi la pwoblèm yé! Gwadloupéyen pa anvi fòsé ankò sitou si sé pou yo monté on mòn ki pa ka fè 200 mèt. An ka chonjé jan an té ka sòti Lapwent pou mwen ay lisé Baimbridge a pyé! Jan an té ka sòti Lapwent pou mwen té ay linivèsité Fouyòl a pyé! Aprézan étidyan yo ka fè èstòp pou yo ay Baimbridge. Sé paran-la menm, yo pwès ka rantré andidan lékòl-la èvè loto a-yo! Gwadloupéyen, nou alèz an-nou menm! Mé tansyon pou on jou gouvèlman fwansé pa ban nou on kou yann osèryé!

On dòt biten ankò! Gwadloupéyen zò ka kontinyé salòpté laliwondaj a péyi-la magré tout kanpagn yo menné pou zò pa sali! E sé sé menm moun-lasa ka chanté an lari-la "Lagwadloup sé tan-nou". Mèt a mannyòk a LKP, fò zò édiké pèp-lasa. Fò nou di pèp an-nou "Ès yo ni konsyans péyi-lasa sé ta yo?". Padavwa si péyi-lasa sé tan-nou, fò nou rèspèté-y!

Pannan twa jou (vandrèdi, sanmdi, dimanch), on délégasyon a LKP té a lendikatif prézan asi lilèt Marigalant. LKP kontré èvè travayè a sèktè agrikòl marigalantè-la. Sé travayè-lasa ka èspliké tout pwoblèm yo ka kontré adan larèl a-yo!

Nou ja sav léta fwansé èvè sé kolèktivité-la pa ka rèspèté sa yo signé èvè LKP. Marigalant sé on lilèt ki ka jwenn dé fwa plis pwoblèm ki kontinan-la.

Marigalant, kon Lésent é Dézirad adan péyi Gwadloup, fò pa nou jen obliyé sa!

Tini déotwa blan-fwans ki toujou fè nou valé on zafè a tourizm mé on tourizm èspésyal. On kalté tourizm ola sé kalté blan-fwans-lasa té ké débaké an péyi Gwadloup, yo té ké touné viré-gadé pannan on simenn, yo té ké woupati an péyi a-yo pou apré yo té ké woutouné Gwadloup enstalé-y on fwa on fwa! Si avan sé kalté blan-fwans-lasa té ka montré bèl figi, on fwa yo té ké rété an péyi an-nou, yo té ké chanjé figi! E sé kon sa dèpi toujou tini déotwa adan yo ka jis mandé-w ka'w vin èché la lè ou ka déplasé-w an péyi a-w ki ta-w! Nou tini onlo témwanyaj a gwadloupéyen asi konpòtasyon a sé kalté moun-lasa. Défen Aimé Césaire té ka palé nou dè on zafè a "génocide par subsitution". Mi travay-lasa sé moun-lasa ka èché fè an péyi an-nou èvè konplosité a politisyen bwabwa an-nou!

La, a pa tourizm ankò sé limigrasyon! On tourizm pou mwen, sé on moun kèlanswa péyi-la i sòti la, ka vin débaké an péyi an-nou, ka touné é viré, ka dépansé lajan a-y a kaz an-nou é apré ka fè zafè a-y. Mi sé sa on touris! Mé sé kalté blan-fwans-lasa vlé kouyonné nèg èvè zafè a on tourizm yo vlé fè ba péyi-la. Mwenmenm, an ja konpwann ki kalté tourizm yo vlé mété an péyi-lasa. Ni sa ka konfonn tourizm èvè imigrasyon!

"Métropole", "département" aprézan "l'été"! Mi pawòl a moun kolonizé an péyi-la! Chonjé avan jan gwadloupéyen té ka nonmé péyi-la ki ka dominé nou la "Lafwans". Blan-Fwans ki débaké an péyi an-nou enki ka mété-yo ka kriyé péyi a-yo "Métropole, métropole". Kifè alè, adan pwès tout gèl a gwadloupéyen ou ka tann "Métropole, métropole". An té byen anvi sav ola asi latè tini on péyi non a-y sé "Métropole"! Sa sé yonn!

Dé! Lè on moun ka kouté télé a fwansé, radyo a fwansé, gwadloupéyen ka woulé adan yo vlé pa menm nonmé Gwadloup "péyi". Yo adan on zafè a "département, département". Konté konmen fwa yo ka di sa adan jounal a-yo! Ni on jounalis fwansé ki té débaké pannan mouvman a 44 jou an-nou an 2009 an péyi an-nou. I té di : "Pourquoi un département ne serait pas un pays?". Non a-y Daniel Mermet a émisyon "Là-bas si j'y suis" a "France-Inter". "Daniel si tu savais comme mon peuple est malade!" Ah wi pou malad i malad menm! Sa sé dé!

Twa! Tèlman i malad, ni on ti-kouyon ki té ansyen prézidan a CCI Lapwent (zò sav ki moun) ki kréyé on zafè a "les universités d'été" an plen péyi Gwadloup ???? Gwadloup on péyi a chalè mésyé! Kifè an té ké mandé kloun-lasa ki tan i ké kréyé "les universités d'hiver" an Gwadloup osi? A pa kouyonnad?!!