-
Par SHAKA (Gwakafwika) le 30 Août 2011 à 20:35
Dèpi déotwa jou an ka rivé pwan asi nèt-la é andidan télé-la, on chenn ayisyen sòti Miami, non a-y "Tropik TV". Adan-y yo ka bay nouvèl a péyi Ayiti ba dyaspora-la ki an péyi Etazini. Ki moun ka prézanté jounal-la? Mi foto a-y!
On fanm Sendomeng? On fanm Vénézwèla? On madanm ki sòti Mèksik? Awa! On Ayiti konpa! An ka ba zòt li pas pèp an-mwen, moun Gwadloup ka konpwann ayisyen sé enki moun nwè! Mi foto a-y!!
Non a madanm-lasa sé Christalie parisot. I ka palé bon kréyòl-la!
E ni onlo kon sa an péyi Ayiti!
Fò zò konpwann, ba moun Gwadloup, si tout ayisyen té kon madanm-lasa, sé té ké bondyé, a pa vré?
Mi dé vidéo ba zòt!
Tann kréyòl-la! Milatrès-la fyè dè lang a-y, dè drapo a-y é dè péyi a-y Ayiti!
Alò gwadloupéyen! Zò konpwann sé enki moun nwè ki an Ayiti? An sav sé koulè nwè-la zò vlé pa vwè! Mwen ki gwadloupéyen, délè zò ka fan'w wont mé pétèt a pa fòt a-zòt, pas zò pa konnèt! E wi, pa konnèt mové!
3 commentaires -
Par SHAKA (Gwakafwika) le 29 Août 2011 à 20:17
Sétè di maten, an ka lévé an kabann an-mwen, manjé, lavé-mwen é lyanné èvè pèp-la asi RTB. Dizè, pwan loto-la mwen travèsé wout nasyonal-la pou rivé an wonpwen Vya Ti-bou ola moun té ja ka vwè drapo wouj-la douvan chimen a plaj-la. Garé loto-la owa lanmè-la é rann-mwen adan sé diféran latilyé-la. An pasan, an vwè jounalis a "Guadeloupe 1ère" ki té ka pati adan loto a-yo. An rété piplis adan latilyé "Lyannaj Karayib-la" ola yo palé onlo dè péyi Ayiti. On atilyé ola té ni twa sè ayisyenn ki ka fè létid a-yo linivèsité Fouyòl. Sèl nonm politik an vwè Vya sé mè Bouyant, misyé Janklòd Malo. Nou sav tout travay misyé Malo ka fè pou pèp Karayib lyanné-yo plis. Apré sé gwan bokantaj a pawòl-lasa, nou a-y manjé. Mwen kon onlo moun an vin èvè kwi an-mwen davwa zafè a plastik sé on danjé pou laliwondaj-la. Apré nou byen bwè é byen manjé, nou kouté sentèz a sèkrétè a LKP, man Natali Minachy é pòt-pawòl a LKP, mòso fè-la misyé Eli Domota. Lè tout sentèz bout, larèl kiltirèl-la komansé èvè slam a I-man é "Silencieux". Aprémidi-la bout èvè kout'tanbou ola misyé Wozan Moueza bay son a prèmyé diks a-y.
On bèl jouné ola solèy kléré plaj Vya. Moun konpwann yo ké fè LKP fè dèyè mé sé moun-la poko konpwann ni on lèspri, sé lèspri LKP!
On bèl jouné osi padavwa misyé Yohann Ruffine té ka ba Lagwadloup lantou siklis Giyàn.
1 commentaire -
Par SHAKA (Gwakafwika) le 25 Août 2011 à 19:48
On pakèt varèch yo di ka sòti Etazini ka vin anvayi tout bòd'lanmè andidan Karayib-la. On pakèt varèch ka kyouyé pwason an-nou. Léta néo-kolonyal fwansé ki ja ni bon pwoblèm a lajan poko paré lévé dwèt a-y. Alò an ka kwè politisyen Gwadloup ké vin ti-bwen mwens initil. Misyé Gillot ja komansé pwan dispozisyon pou sèvis a-y woté varèch adan déotwa komin Gwadloup.
An ja di zòt fò nou pwan péyi an-nou an men padavwa fwansé ki an péyi an-nou tini dòt fè pou bat. Kon pa èkzanp ay lagé bonb an Libi.
1 commentaire -
Par SHAKA (Gwakafwika) le 25 Août 2011 à 14:38
Ay woulé ba ti-blan an Fwans!
Dèpi kèk tan an péyi Matnik, moun ka lévé gawoulé padavwa yo bizwen fè 16 mèt-lékòl matiniké ay woulé an vant a bèt-la.
An pa'a konpwann! A pa matiniké ki di yo vlé rété fwansé a mil a lè on jou 10 janvyé 2010?
Mwenmenm si an té on moun Matinik, an pa té ké signé anmèd pétisyon ba moun!
Fwansé vlé désidé woté
mès é labitid andidan
péyi an-nou.
Nou ka woutouné an péyi Gwadloup é la tini on mèt a bik a kòk ki pa dakò èvè on lwa on madanm dépité fwansé pwopozé. Ka madanm dépité fwansé-la ka pwopozé? I ka mandé yo woté zafè a konbad'kòk adan dènyé koloni a fwansé. Madanm-la oblijé fè-y pas a pa fwansé nou vlé rété yé?
votre commentaire -
Par SHAKA (Gwakafwika) le 22 Août 2011 à 20:02
On dòt bon nouvèl ba péyi an-nou Gwadloup ki ka kontinyé travay a lyannaj a-y andidan Karayib-la. Sé kon sa dèpi jou 13 out an péyi Bawbad, yo fè SPEG* rantré andidan CUT-la*. 35èm konférans-la pati jou 6 pou'y bout 13 out an péyi Bawbad. Yo bòdé an konférans-la onlo kèsyon ola yo palé asi wòl a madanm é sendika adan larèl a mèt-lékòl. Yo bòdé osi kèsyon a réparasyon a lékòl an péyi Ayiti.
Asi RTB, misyé Albertin Plocoste sèkrétè jénéral a SPEG déklaré tout sé péyi-la té ni pwòp drapo a-yo andéwò dè Gwadloup. Kon an toujou di zòt, réyalité-la ké toujou vin touvé nou!
Èspò-la wouvè chimen pou rantré a péyi Gwadloup andidan a Karayib-la, dòt larèl ka suiv. Kon an toujou di osi, péyi Gwadloup i pa an Fwans, i andidan Karayib-la. Wi, divini a péyi Gwadloup andidan Karayib-la, i pa pon dòt koté!
* SPEG (Syndicat des Personnels de l'Education en Guadeloupe)
* CUT (Caribbean Union of Teachers)
votre commentaire
Suivre le flux RSS des articles de cette rubrique
Suivre le flux RSS des commentaires de cette rubrique