Sé pwofitan-la woumèt anwout

osèryé

An ka konpwann plis ki janmen, pou ki biten Lafwans fè pèp Ayisyen péyé lendépandans a-y! Chonjé an bout a lanné 1803, jan larmé a Dessalines, Toussaint, Pétion déchouké larmé a Napoléon an péyi Ayiti. On viktwa ki bout èvè lendépandans a Ayiti on jou 1é janvyé 1804! Kay pasé apré? Pou'y pa anvayi Ayiti ankò on fwa Lafwans fè péyi-la péyé-y an milyon é milyon dola an lò pannan pwès 150 lanné! Gadé alè léta a Répiblik Ayiti, on péyi ki poko sòti anba mizè parapòt a konpòtasyon a fwansé!

An 2009, gwadloupéyen ka lévé gawoulé kont pwofitasyon léta kolonyal fwansé ka mété an péyi an-nou. 44 jou grèv jénéral ki fè béké é léta kolonyal fwansé mal. Apré tout manti-mantè a jounal, télé é radyo ki an sèvis a léta kolonyal fwansé ki fè on pati a pèp an-nou viré LKP do, dé lanné apré léta kolonyal fwansé é sé pwofitan-la bizwen pwan rèvanch a-yo asi pèp-la èvè òkmantasyon a pri a ésans é boutèy gaz-la. On òkmantasyon a ésans kay èvè òkmantasyon a pri a tout kalté marchandiz sitou manjé. Jòd-la, an ay jété on zyé aka déotwa bik entèwnèt é an pé di zòt gwadloupéyen komansé wouklé. Sa an bizwen sav : ès gwadloupéyen ké lévé an mas pou konbat sé kalté lenjistis-lasa? Nou ké la pou nou vwè!

Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!

Nèg ka rété adan bèl gwan kaz, sa

ka fè déotwa chyé an péyi-la!

Yè an té ka di zòt jan fwansé bizwen pwan péyi Kanaky ba yo ; é ben sé menm biten yo ka èché fè an péyi an-nou Gwadloup. Lòtjou san pon moun avèti, yo enki désidé mété déwò on jenn madanm a kaz a-y an komin Bémaho. Swadizan madanm-la pa té ko fin péyé asirans a-y. Mi konbin a déotwa moun vini an péyi-la! Davwa madanm-la té ka rété adan on bèl gwan kaz osèryé, on kaz ki adan on bèl koté komin Bémaho. Alò zò ka tou konpwann nèg ka rété bèl koté adan gwan bèl kaz, sé on biten ka fè sé blan-la chyé! E sé pou sa an ka di zòt moun Gwadloup, panga lè zò ka sèvi èvè lajan a-zòt, pa fè nenpòt ki biten èvè-y davwa lèlmi ka atann enki pyé a-zòt kongné pou i pé sav maché asi zòt!

Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!

Kanaky an danjé!

Pa bizwen ay an péyi-lasa pou zò pé vwè-y mésyé! Kanaky vin on péyi a blan! Zò kay jété on zyé asi jounal a "Calédonie 1ère" pou zò vwè sa! Pou ki biten yo kriyé péyi-lasa "Nouvelle-Caldéonie"? Pas sé blan-la pwan péyi a sé kanak-la ba yo! Sé pou sa mwen Shaka Gwakafwika pé ké jen kriyé péyi-lasa "Nouvelle-Calédonie", an ké toujou kriyé-y KANAKY! Kanaky péyi a pèp kanak, sa klè kon dlo rivyè!

Adan jounal a dimanch pasé, yo montré moun ka lévé bèf an Kanaky adan on sanblé a sendika a-yo. Ka yo montré fwè é sè Gwadloup? On grenn rézen adan on bòl lèt!

Mi danjé-la pèp Gwadloup ka kouri si'y ka lésé péyi a-y ba sé moun-lasa! Kanak vin moun vini an péyi a-yo! Gwadloupéyen panga sa pa rivé nou osi!

Kontinyé voyé pak

a dlo ba moun Bouyant!

Bomaten an ay lamityalité Lapwent otila an vwè èvè onlo plézi gwadloupéyen pòté kon mwenmenm dlo ba moun Bouyant. Davwa fò zò sav komin Bouyant pa tini bon dlo dèpi mové tan-la té fèt an péyi-la. Fò yo pòté réparasyon adan sé twiyo-la pou réglé pwoblèm-la mé sé on biten ké pwan tan. Alò pou nou atann, LKP envité pèp Gwadloup pòté solidarité ba moun Bouyant é sitou ba sé timoun-la. E sé kon sa dèpi bomaten-la é osi pou lendi aprémidi, gwadloupéyen ka chayé pak a dlo an bik-la Lapwent.

On bèl woulo ban nou pèp Gwadloup!

On lanné apré, ayen pa fèt!

12 janvyé 2010, a 4:30 PM, on gwan manman tranblèmanntè té ka soukwé Pòpwens é laliwondaj a-y an péyi Ayiti. On tè ki soukwé é ki kyouyé 300 000 moun! On tranblèmanntè ki fè on pakèt moun blésé!

On lanné apré, ka'y fèt dèpi? AYEN! Sé kon sidiré tranblèmanntè-la té fèt yè! An ka kwè sé moun-la ka fè-y èspré! An ka kwè yo bizwen Ayiti san ayisyen adan-y!