Gwadloupéyen pa ka konpwann!

Magré tout pawòl yo di zòt avan pak té komansé, zò ka kontinyé jété zòdi asi plaj Gwadloup! KOUNYA MANMAN-ZÒT!! An té byen vlé vwè blan pwan péyi-la an men a zòt bann dè malpwòp ki zòt yé! Péyi Gwadloup sé louwé nou ka louwé-y oben péyi-lasa sé tan-nou? Alò si péyi Gwadloup sé tan-nou, annou rèspèté-y souplé! Domnik ki a tè-la la, pèp a-y ka salòpté-y? AWA! Pèp Domnik sav yo ka viv adan on péyi endépandan é yo pé ké touvé manman Langlètè pou okipé dè yo! Konm gwadloupéyen ka konpwann yo ni on manman ki sé Lafwans, alò yo byen sanfouté! Adan lavi, on ti-moun pa ka rété ti-moun ankò, i ka gwandi. Ès gwadloupéyen paré pou yo gwandi? Sé pou sa an ka di lendépandans sé ké on bèl biten ban-nou padavwa lendépandans ké oblijé fè gwadloupéyen vin rèsponsab, yo pé ké ni on manman Lafwnas dèyè do a-yo ankò! Lendépandans ké oblijé gwadloupéyen rèspèté péyi a-yo!

Bomaten-la adan jounal a Janklòd asi RTB, nou ka apwann manblo varé asi grévis a EDF Jarry. Yonn adan sé grévis-la jous touvé-y blésé adan sa, yo té oblijé chayé-y lopital. Mi travay a patron a EDF an péyi Gwadloup! Travayè té sizé douvan pikèt-grèv a-yo san vyolans é manblo ka vin ba yo kou matrak. Mé nou ja sav èvè ki léta nou ni afè! On léta fachis ki pa ka rèspèté ayen! E sé pou sa an ka mandé mwen : " Ka fwansé ka fè isidan toujou?". Zò vlé pa rèspèté ayen, alò foutémwalkan an péyi-la!

BEO-la démaré ofisyèlman sanmdi ola LKP ba pèp Gwadloup lèsplikasyon asi jan yo ké fonksyoné. Brigad monté pou yo ay gadé pri a marchandiz adan magazen. Dèpi BEO-la monté, lèlmi a pèp Gwadloup, sé pwofitan kapitalis béké é bannélo a-yo anrajé kon pa tini. Jis ni on ansyen légyonnè ki di i ké tiré bal asi sé brigad-la! A pa mènas dè mò yo ka kriyé sa? Sé chyen-lasa ni jandam é jij èvè yo alò yo ka konpwann yo sé mèt é sényè an péyi-la. Mé yo pa sav asi ki moun yo tonbé! Nou tini vayan nèg é zendyen an péyi Gwadloup! Pa konpwann blan ké fè sa yo vlé an péyi-lasa!

Sanmdi osi, on òganizasyon té ka fasadé li osi èvè pèp Gwaloup. KAP on òganizasyon ka milité pou Gwadloup tini souvrènté a-y an larèl a manjé.

On pati a pèp Gwadloup ja konpwann fò nou komansé òganizé. On òganizayon ka komansé èvè rèsponsabilité. On pati a pèp Gwadloup komansé pwan konsyans é sé sa ka anmèwdé lèlmi. Té ni hui jou dè sa, yo té envité sèkrétè jénéral a LiGTG é pòt-pawòl a LKP mòso fè-la Eli Domota ola i té ka kriyé pèp Gwadloup pwan chimen a lémansipasyon. On simenn apré adan menm émisyon-la yo envité on salopri non a-y Edouard Boulogne. Nou ja konnèt lespri a sé moun-lasa! Pou yo Gwadloup toujou an tan a lèsklavaj! Sé chyen-lasa ka konpwann nèg ké toujou rété anba bòt a-yo! Avan an té ka toléré yo mé dèpi réyaksyon a-yo pannan mouvman LKP, an konpwann on bon fwa sé moun-lasa sé lèlmi a pèp Gwadloup. Sé mésyé vlé péyi Gwadloup rété anba grenn a fwansé davwa yo sav on fwa péyi Gwadloup té ké endépandan, sé mésyé ké pèd pouvwa ékonomik é politik-la anlè nou! Nou nèg é zendyen, nou an majorité an péyi-la. Alò ki jan moun pé konpwann sé on minorité moun ka dominé an péyi-lasa?

Aprémidi-la Shaka adan lapenn é latristès padavwa on jenn pèd vi a-y lari Lapwent! I pèd vi a-y aprédavwa on jenn kon limenm bay plizyè kout' kouto an mitan kè. Magré tout mannèv yo pòté pou yo té sové-y, i rann dènyé souf a-y adan lésenkèd'laprémidi!  On dram ki fèt a lantré a lari Frébault-la douvan on fawmasi. On jenn an té ka vwè délè ka vann jounal a powèm lari Nozyè Lapwent! Mi aprézan i ja pasé lòt koté-la!

Konmen tan sa ké diré kon sa? Ki jan gwadloupéyen pé lésé jenn a-yo ka kyouyé-yo kon sa? Jénès-la sé divini a on péyi! Tin moun ki byen sanfouté jenn gwadloupéyen ka pèd vi a-yo davwa sé moun-lasa bizwen pwan plas a gwadloupéyen an péyi-la! On Gwadloup ola yo bizwen vwè-y mofwazé adan on nouvo Senbawtélémi!

Sa ofisyèl! Biwo Etid Ouvriyè (BEO) parèt an péyi-la! I maké adan jounal ofisyèl a fwansé. BEO-la té maké adan awtik 21 a pwotokòl dakò LKP té signé èvè sé kolèktivité-la". Mimi-y!

21. La Région et le conseil général accompagneront, à hauteur de 50 000 euros chacun, la création d'un "bureau d'études ouvrières" à condition que celui-ci associe les associations agréées de consommateurs et que ses travaux soient accessibles aux deux financeurs.

Kon di mèt a mannyòk Eli Domota, adan lalit fò nou konstui! BEO-la kay sanblé bénévòl ki kay an ékip kontrolé pri a mawchandiz adan sipèmarché, magazen a zouti, élèktroménajé ...

Misyé Alain Plaisir ki sé on dwanyé an rètrèt prézidan a BEO-la. Kouté RTB jòd-la adan jounal a Janklòd, misyé Alain Plaisir ka ba zòt lèsplikasyon asi BEO-la.

BEO, sé prèmyé fwa sa ka fèt! Ou pa ka touvé sa pon dòt koté asi latè! Woulo ba LKP! Woulo ban nou!