"Pon disou pa pèd. Annou kontinyé nouri lalit pou déchouké tout pwofitasyon!".

Sa sé pawòl kanmarad Eli Domota mété douvan adan jounal a Biwo Etid Ouvriyé (BEO) ki parèt mwa pasé. Wi pon disou pa pèd!

Déotwa biten zò pé touvé adan jounal a BEO

Magazen ki chanpyon adan marchandiz yo woté adan yo

1. Géant Casino Bas-du-Fort 31,55%

2. Ecomax Petit-Pérou           28,99%

3. Boisripeaux Service           28,15%

4. Carrefourt Destreland        28,05%

Magazen ki chanpyon adan wosé pri a marchandiz adan on lanné

1. Boisripeaux Services              +13,67%

2. Super U Grand Camp              + 11,92%

3. Géant Casino                          + 11,83%

On jounal BEO zò pé pwokiré-zòt pou 1 éwo! Zò pé bay plis pou zò pòté  fòs ba BEO-la.

Sanmdi pasé mèt a mannyòk a Biwo Etid Ouvriyé (BEO) té ka sòti ba pèp Gwadloup douvan laprès rézilta a wouchach yo fè adan gwan magazen a manjé a sé pwofitan-la. Tout sé rézilta-lasa yo mèt yo adan on jounal pèp-la ké pé achté nòmalman dèmen adan bik a liv.

Pa obliyé moun ki an péyi-la, oswè-la sé léwòz a LiGTG èvè tanbouyé, chantè é dansè. On léwòz ka fèt douvan bik a LKP Lapwent. On léwòz ola Radyo Tanbou Banbou ké a lendikatif prézan, on radyo ki plis ki janmen ké bizwen fòs a pèp-la pou'y pé sav kontinyé woulé an péyi-la. On léwòz ola kanmarad a CGTG-EDF ké kontinyé sansibilizé pèp-la asi pwoblèm a-yo.

Dèmen Biwo Etid Ouvriyé (BEO) kay sòti rézilta a-y adan on jounal ola i kay palé asi pri kivédi jan sé pri-la monté. On jounal ki kay ni andidan a-y grenn sèl a BEO-la asi wouchach a-y adan sé gwan magazen a manjé-la. On jounal zò ké ni pou 1 éwo, pri LKP!

Menm adan jounal a-yo "Guadeloupe dènyé", jounalis ka touvé pa ni manblo pou alé-vini lari Lapwent mé ka ni manblo pou baré sendikalis! Yè swa manblo touvé mwayen fè grévis a EDF sòti asi pikèt grèv a-yo. Mé pa okipé-zòt, sa pa fè sé sendilkalis fè dèyè. Yo pa tonbé adan zatrap a pwovokasyon a léta néo-kolonyal fwansé mé yo ka toujou rété mobilizé. Dayè zò tann mèt a mannyòk a sendika CGTG palé asi RTB bomaten-la.

Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!

Pété chenn a alyénasyon-la,

on biten ki rèd an péyi Gwadloup.

An ka kouté bomaten-la jounal a RTB é an ka tann on madanm rèsponsab a "Etablissement Français du Sang" (EFS). Madanm-lasa ni labitid palé an téléfòn adan jounal a Janklòd é bomaten-la i sòti dé fwa an bouch a-y on mo ki fè mwen soté. I di dé fwa " Cet été" pou palé dè gwann vakans an péyi Gwadloup!!!

Menm si Gwadloup sé on koloni a fwansé, i pa ka touvé-y owa Senpyè é Miklon kan menm!!! Madanm-la ka kwè-y tèlman i an Fwans, pou'y Gwadloup tini menm klima-la. Gwadloup sé on péyi a chalè é an toujou konnèt dé sézon an péyi Gwadloup :  Karèm é livènaj !

Karèm-la ka komansé an févriyé pou'y bout an mwa jen-la é tout rèstan a lanné-la sé livènaj.

Sé sa an toujou di zòt, aprédavwa yo basiné moun èvè zafè a "métropole" san koloni-la ki kay èvè-y la, mi yo adan on zafè a "l'été".

Asimilasyon, alyénasyon, dé biten ka kyouyé on pèp!

Kouté rèdifizyon a jounal-la  an midi-la é oswè-la, zò ké tann li byen menm!