Sanmdi pasé oswè, RTB té woutonbé anpann ankò. Nou té oblijé atann yè jédi swè pou radyo-la woupwan. Toujou menm pwoblèm-la, on pwoblèm a émétè. Emétè-lasa ka touvé-y owa Lasoufriyè Senklòd. Pou on moun monté owa a-y, fò'y fè-y lè tan-la bèl. Si ni mové tan, ou pé pa monté la. Janklòd adan jounal a bomaten-la ka mandé-y si a pa saboté yo bizwen saboté radyo-la. Adan batiman ola RTB ni èstidyo a-y té tini on pwoblèm a lasansè pas fò zò sav èstidyo-la ka rété adan kenzyèm étaj-la. Lè asansè-lasa ka anpann, sé tout on pwoblèm pou moun monté kenz étaj. Zò ka imajiné sé vyé moun-la? Asansè-la ki ka anpann, émétè a RTB ki ka trapé pwoblèm. An ka kwè Janklòd ni rézon, sé saboté yo bizwen saboté radyo-lasa. Mé nou ja konnèt, nou ni vayan militan ké toujou véyé asi radyo a pèp-la.

Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!

Radyo Tanbou, sé asi 105 pwen asi bann FM-la é sé osi asi www.radyotanbou.net

Radyo Tanbou Banbou, on radyo a jòdi èvè on lidé a dèmen!

Aprédavwa yo vlé fè sibi twa militan LiGTG on penn pwès 10 lanné apré sa ki té rivé laSARA, tribinal a léta kolonyal fwansé ka kriyé dé militan a LIGTG ankò. Kou-lasa non a-yo sé Téty Koupen é Charly Lando. Yo ka akizé yo yo té ké malmenné on patron adan on lotèl.

Pèp Gwadloup, nou ka pwan mo aprémidi-la dézè douvan tribinal a-yo Lapwent!

Lagwadloup sé tan-nou! Lagwadloup a pa ta-yo! Yo pé ké fè sa yo vlé adan péyi an-nou!

Léta kolonyal fwansé poko touvé ki jan i ké fè gwadloupéyen manjé labou! Jòd-la ankò, gwadloupéyen té masyé douvan tribinal a-yo Lapwent. Dèpi vandrèdi, yo té kriyé twa kanmarad a LiGTG pou zafè a laSARA a-yo la. On dosyé vid, vid, vid! Avoka a sé twa kanmarad-la démonté akizasyon-la pak an pak! Kon'y ni labitid fè, léta kolonyal fwansé ka wouvoyé zafè-lasa an mwa out-la ki ka vini la. Léta kolonyal fwansé mélé kon sann an farin-la! I po'o touvé an ki jan i ké kondané sé militan-la padavwa i sav dosyé-la vid! Kon di kanmarad Eli Domota aprémidi-la, zafè a briké-la sété on envansyon a fwansé!

Dayè kanmarad Domota ba pèp Gwadloup mo pou jédi 26 mé ola yo ka kriyé Charly Lando é Naéjus pou zafè a lotèl Kalanda. Yo ka akizé sé kanmarad-la yo té ké agrésé patron a lotèl-la. Nou ja konnèt! Sé ké ankò on dosyé vid! Mé sa pé ké anpéché pèp-la masyé ankò on fwa douvan trinibal a-yo pou byen montré sé mésyé, an péyi Gwadloup tini nèg pa ka jwé chyen kouchan!

Nou bout sanblé-la èvè chanté nasyonal an-nou. Zò konnèt?

Gwadloupéyenn, gwadloupéyen

Gwadloup an danjé

Nou pé pa rété kon sa

Fò nou mèt tout fòs an-nou

Adan on sèl konba pou nou rézisté

Dè jou an jou lènmi ka anvahi nou

Fò nou fè atansyon tan ka pasé

Gwadloupéyenn, gwadloupéyen

Nou tout ka doubout

Tout ansanm pou nou pé

Sové péyi-la

E gannyé libèté an-nou

Sové péyi-la

E gannyé libèté an-nou

E gannyé libèté an-nou

E nou ba yo-y JANTIMAN!

Dèpi plis ki on simenn, Radyo Tanbou Banbou ni on manman pwoblèm asi bann FM a-y. Emétè a-y woutonbé an pann! An ka chonjé an 2004 an ka kwè, yo té ja chanjé-y mé fò kwè sala yo té mèt-la pa té jen soilid! I sifi on mové tan osèryé déklaré an péyi-la, émétè a radyo-la ka soufè. Mi la i tonbé an pann!

Kon yo ka di jòdi-jou, "l'argent c'est le nerf de la guerre". Wi Radyo Tanbou Banbou ka manké lajan. On lajan osèryé pou'y fouté on émétè osèryé asi mòn-la. Pannan mouvman a LKP, annou imajiné on minimòm a 20 000 moun té ké bay 1 éwo tousèl ; sa té ké ja fè 20 000 éwo minimòm! Èvè plis ki 20 000 éwo, RTB té ja achté on manman émétè pou kouvè tout péyi Gwadloup. Nou té ké jis tann li Sentlisi!

Fò pa nou obliyé nou ka menné on gawoulé kont pwofitasyon kapitalis é kolonyalis an péyi Gwadloup. Tout konba ka komansé èvè kominikasyon davwa lèlmi ka sèvi èvè sa onlo, onlo, onlo! Radyo Tanbou sé on zouti filé mé on zouti filé ki délè ka tòtyé. Sé pou sa fò gwadloupéyen ba radyo-lasa on fòs osèryé pou'y kontinyé woulé asi bann FM an péyi-la.

Radyo Tanbou Banbou, radyo a pèp Gwadloup! On radyo a jòdi èvè lidé a dèmen!

Pa kont radyo-la, zò pé tann li asi nèt-la mé konm i pé pa woulé asi bann FM-la, sé enki mizik zò pé tann pou lèmoman asi-y!

Léta kolonyal fwansé désidé mèt anwout asi travayè Gwadloup davwa nèf lanné apré, tribinal a-y désidé kriyé militan a LiGTG kon Gabriyèl Bourgignon, Michèl Madasamy é Frèd Louise. Nèf lanné apré on zafè ki té rivé laSARA ola yo ka akizé sé militan-la yo té éséyé fouté difé laSARA menm! Ka fwansé po'o touvé pou éséyé fè nèg tonbé andalo? Alò sé kanmarad-la té'é fou pou yo té fouté difé laSARA? Nonsèlman yo té'é mò, onlo moun alantou a-yo té'é mò é tout Jarry té'é soté! Mé nou ja konnèt! Sé on jan pou léta kolonyal fwansé vanjé-y apré mouvman a LKP!

Nou patriyòt, fò nou kontinyé konba-la! Alò pou sa ki pé, sanblé-zòt douvan tribinal a-yo Lapwent dèmen vandrèdi a dézèd'laprémidi!

Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!