-
Par SHAKA (Gwakafwika) le 12 Août 2011 à 20:06
Pannan gwadloupéyen ka sipòté kourè a-yo an lantou Gwadloup, jenn ka kyouyé dòt jenn! Aprézan ou pa'a tann on simenn san déotwa jenn ka pèd vi a-yo èvè kouto oben bal fizi dòt jenn ba yo! E pannan sitan sé bwabwa an-nou la dèyè sénatoryal a fwansé, prézidansyèl a fwansé kisi kisila. E yo ka di osi tout biten réglé! LKP mandé moun sanblé pou éséyé ranjé déotwa biten an péyi-la, labann a Fab é Pancha ja di tout biten réglé! Jenn ké kontinyé kyouyé dòt jenn mé tout biten réglé an péyi Gwadloup!
----------------------------------Gwadloup, i adan lèmond, i pa an Fwans!
votre commentaire -
Par SHAKA (Gwakafwika) le 25 Juillet 2011 à 21:31
Kouté, gadé, tann pou zò konpwann! Gwadloupéyen ki konpwann yo pli fwansé ki fwansé, mi foto a-y!
E apré tousa, ou ké touvé nèg ki pé ké jen konpwann
toujou!
2 commentaires -
Par SHAKA (Gwakafwika) le 21 Juillet 2011 à 20:45
Pou sa ki pa'a rivé kwè, mi foto a-y! Zò konpwann
sé jé?
LKP li osi i vwè-y, mi sa i ka déklaré!
Èkzibisyon a trofé kolonyal a 14 juiyé 2011
14 juiyé, on trantenn jenn gwadloupéyen ka fè èstaj a-yo SMA té ka défile asi boulva Champs Elysée. Ka fè 50 lanné SMA ka "fòmé" jenn ki pa ka rivé lékòl adan dènyé koloni a fwansé. Fwansé yomenm a-yo ka blagé lè yo ka di yo ka rivé fè 85% a gwadloupéyen ki adan SMA touvé on travay. Magré nou adan on péyi otila 6 jenn asi 10 pa ka rivé touvé travay.
Alò poukisa yo pa ka mété menm biten adan "métropòl-la" si sa ka maché si byen? Poukisa yo pa ka mété SMA toupatou adan "Fwans Èkzagòn-la" é arèsté chomaj aka sé jenn-la?
Tèlman biten-lasa té ké bon, Nicolas Sarkozy adan famé "Etats Généraux" a-y té prévwa mété dé fwa plis moun adan SMA-la, sa té ké pasé dè 3000 a 6000 jenn. E pannan sitan, AFPA Gwadloup té ka fèmé. Famé sant réjyonal a-yo (CRFP) ki té pou pwan plas a LAFPA poko rivé vwè jou.
Pli fò ankò, on ventenn ti-moun abiyé an doudou kon antan lakoloni, ki té ni oplis 12 oben 13 lanné, té an mitan sé sòlda-la. Mé ka ti-moun té ka fè adan on défilé militè èvè sòlda, fòs èspésyal, léjyonnè, parachitis, moun ka simé lanmò toupatou?
Démonstrasyon-lasa té ka fè moun chonjé ti-moun yo té ka sanblé pou yo chanté é dansé ba sé diktatè-la. Chonjé osi pa ni lontan, jan yo té ka fè fanmi an-nou chanté "Maréchal nous voilà" !
Menm si SMA la pou ba jenn gwadloupéyen fòmasyon, an nou réfléchi si prézans menm a on biten kon sa an péyi an-nou é asi osi prézans a jenn èstajyè é ti-moun Gwadloup adan défilé a 14 juiyé. Fwansé bizwen :
. Montré moun asi latè é piplis pèp fwansé, gwandè é fòs a lanpir kolonyal fwansé.Kon on moun ka montré on trofé i gannyé. Kivédi Lafwans té ni on misyon sivilizatris ola i té ni on pouvwa bondyé té bay pou'y lévé é édiké moun wòlbo pou yo té pé sav mofwazé an nonm.
. Bay osi lidé otila gwadloupéyen té ké pli kouyon lékòl ki jenn fwansé. E sé poukwa yo té ké mété SMA Gwadloup. On lékòl ki pa chouké adan réyalité a péyi Gwadloup oblijé fè jenn an-nou pa rivé ni bon rézilta.
. Mété adan kabèch a jenn gwadloupéyen san Lafwans yo pa ayen.
. Kontinyé adan zafè a "L'année des outre-mers" ola yo bizwen vwa a dyaspora-la pou pwochen élèksyon a prézidan fwansé.
Sa senten! Nou adan fil dwèt a lwa a 23 févriyé 2005 ola yo té ka di kolonizayon é domininasyon a pèp té on bèl biten.
Apré, ké rété yo on sèl biten pou fè : ay fè nou voté adan élèksyon a-yo é fè nou konpwann nou kapab gidonné vi é divini an-nou. E pannan sitan, sosyété Gwadloup ka mò piti a piti.
NOU PE KE LESE YO KYOUYE PEYI-LA E PÈP GWADLOUP!
ANSANM, ANSANM, ANNOU KONTINYE DECHOUKE PWOFITASYON!
GWADLOUPEYEN DOUBOUT!
GWADLOUP SE TAN-NOU! A PA TA YO!
LKP - Lapwent - 17 juiyé 2011.
------------------------------
Shaka éséyé mofwazé tèks a LKP adan lang Gwadloup-la é an ka kwè i dwèt adan kan menm!
--------------------------
Gwadloup, i adan lèmond, i pa an Fwans
3 commentaires -
Par SHAKA (Gwakafwika) le 19 Juillet 2011 à 20:07
Mi kon sa yo enmé jenn an-nou!
Pou on fwa moun ki ni lotorité an péyi Gwadloup fè travay a-yo. Lòtjou kivédi an bout a simenn pasé, yo arété on toufé-yenyen adan on plaj Gozyé "Les Salines". Mé a pa té on toufé-yenyen kon sa té ka fèt avan mé on fèt ola moun ka bwè on pakèt alkòl andidan-la. Konmen moun ki té adan sa? 800 moun! Zò li-y, 800 moun! Pli bèl-la, pon moun té ba yo lotorizasyon pou fè fèt-lasa. Pon moun té ba yo lotorizasyon vann alkòl. Pou vann alkòl on koté fò'w tini on lisans. San konté sé vwazen-la moun ka déranjé èvè mizik-la. San konté osi laliwondaj a plaj-la moun ka sakajé. On dòt kalté "Mercury Day", an di zòt! Mi èvè sa yo ka pwan jenn an-nou!
Pa kont pou touvé 800 jenn pou on mobilizasyon osèryé, ou pa'a touvé pon moun! Sa nòmal piskè yo alèz an sistenm-la! Sa nòmal piskè yo fouté pèp an-nou adan on nwasè! Bay amizman é ou trankil! Èvè amizman, pèp ka obliyé pwoblèm a péyi-la, pèp pé pa lévé gawoulé kont on sistenm! Èvè amizman, sé pwofitan-la pé kontinyé bwè dlo a-yo an péyi-la.
5 commentaires -
Par SHAKA (Gwakafwika) le 15 Juillet 2011 à 20:54
Mi èvè sa yo ka kyouyé ti-moun
adan dòt péyi!
Yè swa an ka konstaté andidan télévizyon-la, yo désidé fè ti-moun Gwadloup chanté adan défilé a 14 juiyé a fwansé! Mésyé, sa pa posib! Ki tan nou ké konpwann nou gwadloupéyen, nou pa dwèt rantré adan sé kalté biten-lasa? Lafwans dwèt sèl péyi asi latè ka fété on fèt nasyonal èvè on défile a militè. Gwadloupéyen, ès zò sav sé èvè zarm zò ka vwè an défilé-la ka sèvi pou kyouyé sivil aka dòt péyi?
Si fwansé vlé kontinyé fè défilé militè a-yo, sé pwoblèm a-yo mé nou gwadloupéyen, annou pa rantré adan sé kalté maji-lasa!
2 commentaires
Suivre le flux RSS des articles de cette rubrique
Suivre le flux RSS des commentaires de cette rubrique