-
Sé enki jounal "France-Antilles" ki palé asi sa adan sé dènyé paj a-y la. E sé enki jòd-la! Poutan sé on zafè ki pasé dèpi vandrèdi. Yo pa jen palé dè sa asi "Guadeloupe dènyé" a-yo! Ka'y té pasé vandrèdi-lasa? E ben on jandam té blésé an zyé on ti-moun Mayòt. Ti-moun-la ni 9 lanné é i ké pasé rèstan a vi a-y èvè on zyé an mwens. Wi, ti-moun-la pèd on zyé. E si i pèd li sé parapòt a jandam-lasa ki tiré asi-y èvè sa yo ka kriyé on flachbòl. Pou'y té pé blésé ti-moun-la kon sa, i dwèt tiré toupré-y menm!
E wi, moun Mayòt, an té di zòt sa! Zò ay rantré an gèl a lou-la lè zò chwazi vini départèman fwansé. Zò pa sav sa zò fè la! Sé kon si diré, zò vann péyi a-zòt ba blan!
Dayè ni on vidéo asi sa ola zò ka vwè jan ti-moun-la blésé. Non a sit-la, mimi-y!
http://www.linfo.re/-Faits-Divers-/Enfant-blesse-a-Mayotte-un-gendarme-en-garde-a-vue?ps=397475
Jandam-lasa pa rété lontan an gardavu piskè i ja déwò èvè swadizan on mizan ègzamen. Nou pé kondéré jandanm-lasa pé ké kondané!
1 commentaire -
GWADLOUP MALI
(Sanmdi 12 novanm : La Courneuve Paris an vant a bèt-la)
Tout on senbòl! On senbòl nou dwèt fèt pli souvan! On lyannaj Karayib-Afwik, an toujou pwoné asi blòg an-mwen. On lyannaj onlo dòt moun ka pwoné osi dèpi nanni-nannan! On lyannaj èvè on kontré foutbòl. Wi, Gwadloup-Mali, on match foutbòl sé ti-boug Gwada-la kay jwé adan èstad La Courneuve Paris an vant a bèt-la. Ekip nasyonal Gwadloup ki ka préparé-y osèryé pou Gold Cup a CONCACAF-la kay fasadé adan on match zanmi èvè ékip nasyonal Mali ki kalifyé-y pou koup a sé nasyon afwikenn-la ki kay jwé lanné pwochenn. On ékip Mali nou ka touvé adan-y Frédéric Kanouté avan a FC Seville an Èspagn é Seydou Keita dèmi a FC Barcelone toujou an Èspagn.
An nou èspéré match-lasa ké fèt, an nou èspéré osi vwè Gwadloup é Mali èvè méyè jwè a-yo é an nou èspéré piplis vwè match-lasa an télévizyon-la pou sa ki pé pa déplasé pou yo ay an vant a bèt-la.
Gwadloup-Mali, on match ki ké jwé nòmalman sanmdi 12 novanm La Courneuve Paris. On match nou pa dwèt manké an pon jan!
1 commentaire -
Yè sanmdi an té ka kouté kon a labitid émisyon a misyé Wojé "An nou gadé pli lwen". E an bout a émsiyon a-y la, i té ka palé asi zafè a bank ola sé moun rich-la té ka séré lajan a-yo pou yo pa péyé enpo. Vou ki ja pa ni, sé vou pou péyé mé a pa sé moun a lajan-la! E pou ilistré sa, Wojé pasé on son onlo moun té enmé an péyi Gwadloup é an péyi déwò osi. On son an dansé onlo asi-y lè an té an vant a bèt-la. On awtis ki sòti an péyi Kongo é ki malérèzman ja lésé nou ; sété an lanné 1996-la. Non a-y Pamelo Mounk'a. Non a son-la an fwansé "L'argent appelle l'argent".
Mèsi Wojé pou son-la! Sa ka fè mwen chonjé lèbon tan! An menm balan-la, ban fè zòt partajé-y osi èvè zòt! E an senten onlo adan zòt konnèt li!
L'argent appelle l'argent
Mbongo ekobenga Mbongo
L'argent appelle l'argent
Mbongo ekobenga Mbongo
votre commentaire -
Sé èvè drapo a nasyon Gwadloup
manmzèl Agis-Lacazette kay konbat
adan chanpyona panamériken jinyò
ki ka fèt an bout a simenn-lasa Las Vegas (Etazini).
Dèpi yè vandrèdi jis a bout a simenn-la ja komansé Las Vegas an péyi Etazini, 6èm chanpyona panamériken jinyò. Manmzèl Lovely Agis-Lacazette kay sèl rèprézantan a nasyon Gwadloup adan ripaj-lasa. I ka komansé konbat jòd-la koté huitè é dimi, lè Las Vegas. Adan poul a-y i kay bouwé èvè on mérikenn, on mèksikenn, on kanadyenn é on kòstarikenn. Nou ka èspré i ké monté asi podyòm-la. On ti-fi ki ni enki 14 lanné é ki kay fasadé èvè jinyò ki pli gwan ki-y. Nou ka voyé, tout pèp Gwadloup ka voyé bon fòs ba-y!
Taekwondo Gwadloup sèl èspò a CIO ki trapé lendépandans a-y. Lanné pwochenn ékip nasyonal Gwadloup kay fasadé èvè dòt nasyon asi latè adan pwochen chanpyona di mond ki kay fèt an avril an Ejipt. An nou imajiné on kontré on gwadloupéyen pé fè èvè on...fwansé adan chanpyona di mond-lasa!
votre commentaire -
1700 é monné èvè 2011, ayen pa chanjé!
Bomaten-la adan jounal a RTB, mòso fè-la misyé Eli Domota té ka bokanté pawòl adan téléfòn-la èvè misyé Janklòd. E yo té ka palé asi zafè a fanm béké-la ki kraché é kriyé sé ponpyé-la "Pa mannyé mwen, sal nèg!". Imajiné-zòt kanmarad, yo té ké touvé adan san a fanm béké-lasa alkòl é ...kokayin! Non a fanm béké-lasa sé Sylvie Hayot! Zò byen li-y, on dénonmé Hayot. Hayot ki mèt a mannyòk adan on gwan magazen a manjé an komin Bémaho. On koté onlo gwadloupéyen ka vin achté. Fanmi Hayot, moun Matinik, moun zansèt a-yo té èsklavajis. Moun ki poko konpwann nou ja chanjé syèk. Alò konm sé on Hayot, zò konpwann yo menné-y lajòl? Awa, yo éséyé, bannélo blan a-y éséyé fè-y pasé pou on fanm fòl. Télévizyon a lété néo-kolonyal fwansé pa jen palé dè istwa-lasa. Sé enki jounal "France-Antilles" ki fè on awtik adan paj 2 a jounal a-y. Jounalis a RCI ki té mèt zafè-lasa déwò kay vwè avoka padavwa sé béké-la té ké mènasé-y. Mé nou ja konpwann adan ki péyi nou yé. Nou sav dèpi lontan léta néo-kolonyal fwansé èvè sé béké-la an konplosité an péyi Gwadloup. Dayè sé kalté béké-lasa pa ka rantré Lélizé an Fwans kon si diré sé adan kaz a-yo yo ka rantré? Nou vwè sa an 2009 adan émisyon-la "Les derniers maîtres de la Martinique".
On biten an bizwen konpwann. Magré tou sa sé kalté moun-lasa ka fè gwadloupéyen, ki jan nèg pé kontinyé vin menné lajan ba sé mésyé? Sé on biten an poko jen konpwann. Vrèman, nèg-la enmé kout'fwèt-la menm!
E mèsi "Caraibcreolenews" pou foto-la! I ka rézimé tout biten-la!
2 commentaires