Nou apwann sa anlè RTB ola bomaten-la Eli Domota té ka di adan jounal a Janklòd, manblo té ké kyouyé on manifèstan èvè on kou flachbòl an mitan lèstomak a-y. I ba-y li toupré! Pou toufé zafè-lasa, médya fwansé asi nèt-la ja ka di i té ké mò pas i té ké trapé on kriz kardiak. E an plis di sa, yo ka di yo pa té ké touvé pon mak a flachbòl anlè-y. Ay kwè sé mésyé! Pa ni lontan, on ti-moun té pèd on zyé parapòt a on mablo ki té tiré on kou flachbòl toupré tèt a-y. Flachbòl ka ranplasé bal fizi mé pa tini pon diférans antrè sa ka fèt Mayòt an 2011 é sa ki fèt an péyi Gwadloup an Mé 1967.

Magré réprésyon a léta néo-kolonyal fwansé, magré yo bizwen fè moun pè, grèv jénéral-la ka kontinyé Mayòt!

Boug an-mwen, gadé sa ou ka fè?

On sendika Mayòt désidé pété lyannaj sosyal-la ki té ja komansé adan mòso a péyi Komò. Wi mésyé FO Mayòt désidé yè signé on akò alò kè rèstan a entèwsendikal-la pa té dakò! Léta néo-kolonyal fwansé toujou maché kon sa, fouté divizyon pou'y pé sav pété on mouvman. Ki jan on moun pé signé on akò ki ké valab twa mwa? Antouka, entèwsendikal-la sanblé-y yè é i désidé i ka woukondwi grèv-la. I ké fè-y san FO!

Evaris! Ay palé ba boug a-w la!

Dèpi vandrèdi pasé, on délégasyon a CROSGUA (komité olenpik é èspòtif Gwadloup) adan vil Guadalajara an péyi Mèksik ola ka fèt 16èm jé panamériken-la (14 jis 30 òktòb). On kalté jé olenpik ka fèt adan zòn panamérikenn-la. On gwan ripaj a èspò ki ka sanblé 42 nasyon *. On bèl répétisyon jénéral avan jé olenpik a London (Anglètè) lanné pwochenn.

Délégasyon a CROSGUA ki vwè sérémoni douvèti-la, kay woulé an vil Guadalajara pou fè nasyon Gwadloup rantré adan komité olenpik panamérikenn-la. Misyon a-y sé fè péyi Gwadloup voyé on délégasyon pou jé panamériken 2015-la an vil Toronto an péyi Kanada.

Jé panamériken 2011 an vil Guadalajara (Mèksik) : 14 jis 30 òktòb

*Sé 42 délégasyon-la :

Antig é Bawbouda, Antiy Olandèz, Awjantin, Awouba, Ayiti, Bahamas, Bawbad, Bèmid, Béliz, Bolivi, Brézil, Chili, Dominik, Ekwatè, Etazini, Giyana, Grènad, Gwatémala, Irigwèy, Jamayik, Kanada, Kiba, Kolonbi, Kòstarika, Mèksik, Nikaragwa, Ondiras, Panama, Paragwèy, Pérou, Pòtoriko, Salvadò, Sendomeng, Senkis é Névis, Sentlisi,  Senvensan é Grènadin, Sirinam, Trinidad é Tobago, Vénézwèla, Zil Kayiman, Zil Vyèj Anglé, Zil Vyèj Mériken

18 òktòb 1983, Maurice Bishop prézidan a nasyon Grènad endépandan dèpi 1979 té ka tonbé anba bal fizi apré anvayisman a larmé amérikenn a péyi-lasa. Maurice Bishop ki té mété asi pyé on èspéryans sosyalis ki té ka maché byen toubòlman an péyi Grènad. Sa pa fè labann a Ronald Regan plézi é sé kon sa yo désidé koutkilon débarasé yo dè gwan nonm-lasa ; tou sa èvè bénédiksyon a Eugenia Charles prèmyé minis a Domnik.

Dayè gadé on èspich a-y i té fè New York an 1983 ola i ka di sé sèlman révolisyon ki ké fin bat èvè lèspwatasyon kapitalis asi latè.

17 òktòb 1961, on pakèt aljéryen té ka tonbé

anba bal fizi a léta kolonyal fwansé.

17 òktòb 1961, on lanné avan lendépandans a péyi Aljéri, FLN té ka voyé on mésaj ba pèp a-y an Fwans pou on manifèstasyon kont kouvrèfé a préfé Paris Maurice Papon. Milyé é milyé aljéryen èvè osi tinizyen é mawoken té ka défilé lari Paris. An tan lasa, pa té ni lakrimojèn mé bal fizi. E sé kon sa manblo fwansé touvé mwayen kyouyé on santèn moun Paris. Yo jété onlo moun mò anba "La Seine" a-yo la. Natirèlman pou léta fwansé, sigré léta!

Wi sè é fwè an péyi-la, ka fè 50 lanné, on dèmi-syèk,  fwansé fè on gwan krim kolonyal. On dòt krim a menm léta fwansé-lasa ké fèt sis lanné apré, sé ké an péyi an-nou Gwadloup. I ké kyouyé omwen 200 gwadloupéyen! E la osi, sigré léta!