Koup a sé nasyon afwiken-la 2012 an péyi Gabon é Giné Ekwatoryal

(21 janvyé jis 12 févriyé)

Gwoup A                     Gwoup B                 Gwoup C           Gwoup D

Giné Ekwatoryal          Kòtdivwa                  Gabon               Gana

Libi                            Soudan                    Nijè                  Bòtswana

Zanbi                         Birkina Faso              Tinizi                Mali

Sénégal                     Angola                      Mawòk             Giné 

Gwan absan :

Kamroun, Nijérya, Ejipt, Afwik di Sid, Aljéri.

Yè swa, gwadloupéyen té ni mo èvè on pwofésè, on éjiptològ, pwofésè Kangé Ewané an sal "Rémy Naisuta Lapwent". On konféras-déba ki komansé èvè on dèmiyè rèta mé sa pèrmèt on pakèt gwadloupéyen vin sanblé an sal-la. On sal ki vrèman té two piti tèlman té ni moun adan-y.

Pwofésè Kangé Ekangé fèt an 1932 an péyi Kamroun. I té konpagnon dè wout a on dénonmé Cheick Anta Diop.

Déba a konférans-la té ka pòté asi sé endépandans afwikenn-la.

Sa nou pé kenbé adan sa i di, fò nèg-la pa atann si blan pou péyi a-y vansé! Padavwa blan-la sé entéré a-y i ka vwè. I di osi, sa nou konnèt, fò nou ba-y li ba jénès-la ka vini la.

 Pou nou chonjé sè é fwè an-nou Dominik. Misyé David Registre pòté on méday dè bwonz ba péyi a-y Dominik adan so an longè-la adan jé panamériken-la ki ka fèt Guadalajara an péyi Mèksik. On vénézwélyen pwan lò-la é on chilyen awjan-la. Pou lèmoman, sé sèl méday a nasyon Domnik.

Yo di ni on ékonomis ki sòti an péyi Ekòs é ki té di tout sé péyi-la ki fè richès a-yo asi do a nèg pannan lèsklavaj ké péyé sa. An ka kwè sé sa ki komansé fèt padavwa Léwòp adan on kriz a lajan osèryé. Tèlman gouvèlman adan sé péyi-lasa pé pa réglé pwoblèm-la yomenm a-yo, yo oblijé kriyé "BRICS" pou'y vin an sèkou a-yo. Ka sa yé sa "BRICS"? E ben sé on lyannaj a péyi ka monté an larèl ékonomik-la. Yo senk! Non a-yo Brézil, Risi, End, Chin é Afwik di Sid. Sé péyi-lasa ja di yo paré pou pòté Léwòp sèkou mé enki adan kad a FMI. FMI ki nòmalman ka vini an sèkou a péyi maléré, mi-y paré pou Léwòp! Mé Etazini ki mèt a mannyòk a òganizasyon-lasa pa jen cho pou'y pé sové Léwòp davwa limenm a-y an pwoblèm.

E wi, kon an toujou ka di, lè on moun ka fè krim, malè oblijé vini touvé-y apré. Bondyé pini pa'a rété lwen!

Jé panamériken 2011 Guadalajara (Mèksik)

Atlétizm : Adan final a 100 mèt-la, sé on jamayiken misyé Lerone Clarke ki gannyé èvè on tan a 10.01 douvan chanpyon di mond 2003-la misyé Kim Collins (Senkis é Névis). Sé Emmanuel Callender a Trinidad é Tobago ki pwan twazyèm plas-la. Plis ki janmen, Jamayik ka montré i sé mèt a mannyòk adan 100 mèt-la. Mimi-y!