Kanmarad, zò dwèt tann bomaten-la adan jounal a Janklòd asi RTB, Eli Domota rann on omaj ba Dominik Gladone ki mò simenn-lasa an lanmè-la an komin Lanzbètran.

Dominik Gladone yonn adan sé mèt a mannyòk a taèkwondo Gwadloup. Dominik ki té chanpyon a Karayib-la an 2010 an péyi Bawbad. Li èvè lé Fostin goumé pou Gwadloup vini on nasyon mondyal a taèkwondo-la. E wi, dèpi on jou 30 avril 2011, Gwadloup ofisyèlman adan fédérasyon mondyal a taèkwondo (WTF). Kifè Gwadloup ké pé ay limenm a-y adan tout konpétisyon entènasyonal kon chanpyona di mond! Dayè Dominik Gladone èvè manmzèl Perle Miny té rèprézanté nasyon Gwadloup adan 7èm tounwa entènasyonal-la Paris mwa-lasa. An té fè dé awtik asi sa anlè blòg-la, zò ka chonjé? Dominik Gladone ki pòté koulè a Lagwadloup, ki pòté drapo a Lagwadloup  wo toubòlman!

Véyé a gwan nonm-la ké fèt lendi swè aka "Bédé Desbranches" Vyébou Zabim.

Dominik, ou ké toujou rété adan lèspri an-nou!

Woulo-bravo ba manmzèl Perle Miny!

Drapo nasyon Gwadloup an figi a moun! Zò pa'a vwè-y???!!!

E an plis an vant a bèt-la!

Ekip nasyonal Gwadloup a taèkwondo té voyé dé konbatan adan 7èm tounwa entènasyonal Paris ki fèt an bout a simenn pasé. Nou pé di rézilta-la té antrè fit é fant.

Aka sé sényò-la, Dominique Gladone (-68 kilo) pa pasé prèmyé tou-la. Sé awbit-la diskalifyé-y padavwa i té ba on kou entèwdi an figi a lalvèsè a-y.

Pa kont, kontantman-la vini koté manmzèl Perle Miny an katégori jinyò (-44 kilo). I monté asi twazyèm mach a podyòm-la!!! Tou sa dèyè Sarah Malykke (Dànmak) chanpyonn déwòp souplé! E osi dèyè Lucija Mladenovic (kroasi) vis-chanpyonn déwòp, zò pa'a li-y?!! Sé on bon sign avan chanpyona di mond jinyò-la ki ké fèt an Ejipt lanné pwochenn.

On bèl woulo bravo ba taèkwondo Gwadloup ki ka montré an figi a toutmoun asi latè, i sé on nasyon!

Pwochen randévou a ékip Gwadloup ké pou "US Open" an péyi Etazini an mwa févriyé.

Chimen a Perle Miny adan tounwa-lasa

 1é tou : I gannyé on rèprézantant a péyi Nòvèj 25-19

Kadèfinal : I gannyé on rèprézantant a Répiblik Tchèk 15-7

Dèmifinal : I pèd douvan Lucija Mladenovic (Kroasi) 8-14

Sanmdi é dimanch, ékip nasyonal Gwadloup a taèkwondo kay voyé dé konbatan misyé Dominique Gladone (sényò) é manmzèl Perle Miny (jinyò) adan 7èm édisyon a tounwa entènsasyonal Paris an vant a bèt-la.

121 nasyon ké a lendikatif prézan. Adan yo, nou ké touvé onlo atlèt ki ka paré-yo pou pwochen Jé Olenpik ki kay fèt lanné pwochenn London an Anglètè.

Gwadloup ki dèpi mwa avril afilyé adan fédérasyon mondyal a taèkwondo, kay sèvi èvè tounwa-lasa pou préparé pwochen chanpyona di mond jinyò ki kay fèt lanné pwochenn an Ejipt é osi sitou pou chanpyona di mond sényò ki kay fèt an 2013.

"Dòktè" Socrates (1954-2011)

60 sélèksyon é 22 bi adan ékip

nasyonal a Brézil.

Moun a foutbòl ka touvé-yo an penn padavwa on gwan jwè brézilyen lésé nou yè dimanch adan on lopital Sao Paulo (Brézil). Non a-y "dòktè" Socrates, ansyen kapitèn a ékip nasyonal a Brézil ki jwé dé koup di mond an 1982 é 1986 èvè labann a Zico, Eder, Falcao, Junior, Careca, Edinho é konsò. An 1982 nòmalman, Brézil té dwèt vin chanpyon di mond lanné-lasa mé ékip-lasa pa té véyé asé on jwè italyen, Paulo Rossi.

Socrates té osi on dòktè mé sa pa anpéché-y sòti adan pwoblèm a alkòl ki fin pa kyouyé-y yè.

Gadé on bi i té maké pannan lakoup di mond 1982 an Èspagn douvan LiRSS.

Adyé dòktè!

Drapo gwadloupéyen-la pannan défilé a sé délégasyon-la pou wouvè chanpyona panamériken a surf Lanzbètran Gwadloup.

Menm lig foutbòl gwadloupéyenn-la pa menm té ni asé grenn pou prézanté drapo a nasyon an-nou an Karayib-la. E poutan nou sav tini patriyòt adan lig foutbòl an-nou. Apré taekwondo-la, mi surf-la pa pè afiché drapo a péyi Gwadloup!

Zò ka vwè drapo Gwadloup ka akonpagné drapo kiben-la. Wi mésyé, karibéyen nou yé, karibéyen nou ké rété!

Zò ka vwè osi ni tout koulè dèyè drapo an-nou! Alò lè an ka vwè déotwa nèg an péyi-la toujou dèyè on drapo fwansé, an ka di vrèman adan kabèch a sé nèg-lasa, tini pwoblèm!