-
Dominik, ou ké toujou rété adan lèpsri an-nou!
Kanmarad, zò dwèt tann bomaten-la adan jounal a Janklòd asi RTB, Eli Domota rann on omaj ba Dominik Gladone ki mò simenn-lasa an lanmè-la an komin Lanzbètran.
Dominik Gladone yonn adan sé mèt a mannyòk a taèkwondo Gwadloup. Dominik ki té chanpyon a Karayib-la an 2010 an péyi Bawbad. Li èvè lé Fostin goumé pou Gwadloup vini on nasyon mondyal a taèkwondo-la. E wi, dèpi on jou 30 avril 2011, Gwadloup ofisyèlman adan fédérasyon mondyal a taèkwondo (WTF). Kifè Gwadloup ké pé ay limenm a-y adan tout konpétisyon entènasyonal kon chanpyona di mond! Dayè Dominik Gladone èvè manmzèl Perle Miny té rèprézanté nasyon Gwadloup adan 7èm tounwa entènasyonal-la Paris mwa-lasa. An té fè dé awtik asi sa anlè blòg-la, zò ka chonjé? Dominik Gladone ki pòté koulè a Lagwadloup, ki pòté drapo a Lagwadloup wo toubòlman!
Véyé a gwan nonm-la ké fèt lendi swè aka "Bédé Desbranches" Vyébou Zabim.
Dominik, ou ké toujou rété adan lèspri an-nou!
Tags : dominik, adan, gwadloup, gladone, taekwondo
-
Commentaires
Kè nanm-ay pozé an pé !