Ekip nasyonal Gwadloup pasé a koté Gold Cup-la padavwa té ka manké-y préparasyon pou'y té pé sav fè on bon chimen. Sa maché an 2007 pou prèmyé vini a-y pas sé boug-la té motivé. Sa maché an 2009 osi. Nou konpwann sa té ké menm biten lanné-lasa! Mé sè é fwè, ékip an-nou alèkilé, tout moun adan zòn CONCACAF-la konnèt li, i pé ké sirpwann moun kon an 2007. An ka kwè mésyézédam, fò nou arété kyoké! Menm si nou poko ka viv adan on péyi ki endépandan, an nou konsidéré sélèksyon an-nou kon ékip nasyonal. Dayè sé toujou kon sa an kriyé-y, on ékip nasyonal. Kivédi fò adan òganizasyon a-y nou woulé kon ékip nasyonal. Menm si pou lèmoman nou poko rantré laFIFA.

Dèpi an rantré asi nèt-la, an toujou fò ékip an-nou rantré laFIFA. Nou pé pa tini pon préparasyon osèryé èvè jwè nou vlé si sé klèb-la pa tini pon obligasyon lagé yo. Jamayik ki adan laFIFA té bi jwè a-y pou on mwa. I jwé on match zanmi douvan Vénézwèla, i ay fè on èstaj 15 jou an péyi Brézil. Sa ka péyé davwa Jamayik kay sèl rèprézantan a Karayib-la an kadèfinal. I kay férayé douvan Etazini. On ékip ki douté douvan Gwadloup avan-yè swè.

Dèmen sanmdi a sizèd'swè, lè Gwadloup, tout pèp-la ké touvé-y douvan télé a-y davwa ékip nasyonal an-nou kay jwé divini a-y douvan Kanada pou dézyèm match a-y adan Gold Cup a CONCACAF-la. Aprédavwa nou pèd kouyaman douvan Panama 2-3, nou oblijé fè on bon rézilta douvan sé kanadyen-la.

Gwoup B : Jamayik - Grènad 4-0

                Ondiras - Gwatémala 0-0

Gwoup C : Panama - Gwadloup 3-2

                Etazini - Kanada 2-0

Drapo nasyonal Kòs

Chanté nasyonal kòs : Dio vi salvi regina

Yè aprémidi-la an ka vwè andidan télé-la, on ékip nasyonal a péyi...Kòs ka fasadé adan on match zanmi èvè ékip nasyonal a Bilgari!!! Kòs ka vwè sa ka fèt owa an-nou! Kon ékip nasyonal Gwadloup, yo vlé éséyé ni on non! Zò ké vwè-y adan vidéo-la! E pli bèl-la mimi-y! Gadé vidéo-la é a 3:39, zò ké vwè drapo a péyi Kòs é zò ké tann sitou chanté nasyonal a péyi Kòs!

Nou gwadloupéyen, nou ka kontinyé ay adan konpétisyon a moun-la èvè drapo é chanté a lòt-la!

 Sé kòs-la gannyé 1-0!

Gwoup A : Kòstarika - Kiba 5-0

                Mèksik - Salvadò 5-0