Jenn an-nou fè péyi a-yo plézi pannan vakans a pak-la padavwa gwadloupéyen pwan on pakèt méday an larèl a-yo piplis an natasyon. Wi adan CARIFTA GAMES natasyon an péyi Bawbad, Gwadloup rivé trapé 55 méday (11 an lò, 25 an awjan é 19 an bwonz). Sa myé ki lanné pasé ola Gwadloup té trapé 47 méday an péyi Jamayik. Gwadloup ka bout ripaj natasyon-la prèmyé nasyon èvè 747 pwen douvan Trinidad é Tobago (679) é Bahamas (599). Najè Gwadloup ka ban nou mo pou péyi Bahamas lanné pwochenn èvè pou misyon kontinyé dominé natasyon adan Karayib-la.

Adan CARIFTA GAMES atlétizm-la an péyi Jamayik, Gwadloup fè on méyè rézilta ki lanné pasé ola i té pwan enki 3 méday. Gwadloup trapé lanné-lasa 6 méday (3 an lò, 1 an awjan é 2 an bwonz). Gwadloup ka bout senkyèm nasyon lwen dèyè Jamayik ki trapé 66 méday (33 an lò!!). Jamayik sé vrèman on nasyon a atlétizm! Nou pé répété sa!

LaFIFA pwan on désizyon! I pé ké voyé ékip jinyò a Lagwadloup an koup di mond menm si sé jwè-la té ké gannyé plas a-yo asi téren-la. Pouki sa? Padavwa Lagwadloup pa adan laFIFA! E pouki i pa adan laFIFA? Pas i dépawtèman fwansé toujou!!!

An ka èspéré zafè a koup di mond-lasa ké fè gwadloupéyen wouvè zyé a-yo. Fò nou ni konpòtasyon a on péyi! Nou vlé rété similé èvè fwansé é an menm balan-la nou vlé rantré adan koup di mond a moun-la? Awa, sa pa posib!

Sé oswè-la ékip nasyonal jinyò Gwadloup kay fasadé èvè dòt ékip a CONCACAF-la adan chanpyona a zòn-la pou on kalifikasyon asi téren é sitou asi papyé pou on koup di mond! Pou ki asi papyé? Padavwa nou ka èspéré fédérasyon foutbòl fwansé èvè laFIFA ké dakò pou sé jenn ti-boug Gwada-la jwé lakoup di mond an péyi Kolonbi. E wi, lè ou pa endépandan politikman, mi sa ka rivé-w! Pannan sé jenn ti-boug Gwada ké jwé douvan Kanada oswè-la, misyé Jak Rugard té ké ja téré. E wi, sé parapòt a gwan nonm-lasa si péyi an-nou ka fasadé èvè nasyon a LiFC é CONCACAF-la.

An nou voyé on fòs ba jenn an-nou!

Bomaten-la tout pèp Gwadloup té ka apwann mò a on gwan patriyòt, non a-y misyé Jak Rugard. Si alè moun ka palé dè Gold Cup é dè "Gwadaboys", sé parapòt a gwan nonm-lasa. Jak Rugard sété ansyen prézidan a Lig Foutbòl Gwadloup (LGF) ki té nonsèlman on gwan gwadloupéyen mé osi on gwan karibéyen. I milité tout vi a-y pou foutbòl an-nou rantré an Karayib-la.

Plis kamo asi "Boul an Karayib-la" (caribbeanfoot.overblog.com).

Mi rézilta a tiraj osò laCONCACAF fè New-York pou gwan chanpyona a-y Gold Cup-la ki kay jwé an mwa jen-la an péyi Etazini. On tounwa ola ékip nasyonal Gwadloup ké a lendikatif prézan. Sé ké twazyèm vini a-y apré ta 2007 ola i té ay an dèmifinal é apré ta 2009 ola i té rivé enki an kadèfinal. Lanné-lasa sé ti-boug Gwada-la kay férayé rèd èvè Panama, Kanada é Etazini péyi òganizatè-la.

Pou plis kamo asi Gold Cup-la, lyanné-zòt aka "Boul an Karayib-la" asi caribbeanfoot.overblog.com

Tiraj osò a Gold Cup a CONCACAF 2011-la

Gwoup A                     Gwoup B                       Gwoup C

Mèksik                        Ondiras                         Etazini

Salvadò                      Gwatémala                    Kanada

Kiba                           Grènad                          Panama                    

Kòstarika                    Jamayik                         Gwadloup

Gold Cup a CONCACAF-la ké démaré èvè Kòstarika - Kiba dimanch 5 jen é final-la ké jwé sanmdi 25 jen an vil Los Angeles.