Dèpi plis ki on simenn, Radyo Tanbou Banbou ni on manman pwoblèm asi bann FM a-y. Emétè a-y woutonbé an pann! An ka chonjé an 2004 an ka kwè, yo té ja chanjé-y mé fò kwè sala yo té mèt-la pa té jen soilid! I sifi on mové tan osèryé déklaré an péyi-la, émétè a radyo-la ka soufè. Mi la i tonbé an pann!

Kon yo ka di jòdi-jou, "l'argent c'est le nerf de la guerre". Wi Radyo Tanbou Banbou ka manké lajan. On lajan osèryé pou'y fouté on émétè osèryé asi mòn-la. Pannan mouvman a LKP, annou imajiné on minimòm a 20 000 moun té ké bay 1 éwo tousèl ; sa té ké ja fè 20 000 éwo minimòm! Èvè plis ki 20 000 éwo, RTB té ja achté on manman émétè pou kouvè tout péyi Gwadloup. Nou té ké jis tann li Sentlisi!

Fò pa nou obliyé nou ka menné on gawoulé kont pwofitasyon kapitalis é kolonyalis an péyi Gwadloup. Tout konba ka komansé èvè kominikasyon davwa lèlmi ka sèvi èvè sa onlo, onlo, onlo! Radyo Tanbou sé on zouti filé mé on zouti filé ki délè ka tòtyé. Sé pou sa fò gwadloupéyen ba radyo-lasa on fòs osèryé pou'y kontinyé woulé asi bann FM an péyi-la.

Radyo Tanbou Banbou, radyo a pèp Gwadloup! On radyo a jòdi èvè lidé a dèmen!

Pa kont radyo-la, zò pé tann li asi nèt-la mé konm i pé pa woulé asi bann FM-la, sé enki mizik zò pé tann pou lèmoman asi-y!

Sanza, karimba, mbira, mangambeu! Ka sa yé sa ankò? E ben kanmarad, sé on enstriman mizik on sénégalè té ban mwen lè an té a kaz a-y an vil Zinguinchor an 1999. On entrisman ki té fèt adan on kalbas ola yo fè on tou an mitan-ay é yo mété 10 lanmèl fè asi-y. Yo ka kriyé-y osi pyano pou pous!

Sanza oben karimba fèt osi adan on ti-planch a bwa é pé pwan 10, 12, 24 lanmèl a fè anlè-y.

On dòt biten nèg envanté é on jou ou ké tann sé blan ki fè-y!

Enstriman-lasa, yo ka kriyé-y :

- Sanza an péyi Santrafwik

- Likembé, budongo, mbila, mbira an péyi Zimbabwé

- Mangambeu an péyi kamèroun

- Kondi an péyi Syéra Léwòn

- Karimba, Kalimba an péyi Ouganda

Mi foto a-yo é mi kon sa yo ka jwé sa!

Pa kwè kafé  sé on biten a blan! Moun ka konpwann pas yo ka bwè sa onlo an Fwans, kafé sé biten a blan! Awa kanmarad! Kafé-la sòti on koté blan pa jen kolonizé, an vlé palé péyi Etyopi! Yo di té ni lontan, lontan, lontan, an Etyopi, on boug ki té ka maré kabrit té vwè grenn kafé tonbé adan on kannari dlo cho é i té touvé-y bon aprédavwa i té bwè-y!

Wi kanmarad, kafé-la sòti Etyopi, i janblé lanmè wouj-la, i pasé pa péyi Yémèn, i rivé an Tirki pou'y bout Lòksidan!

Adan sé péyi mizilman-la, yo ka fè sérémoni a té mé an Etyopi, sé sérémoni a kafé moun ké touvé. Mimi-y!

Yonn adan sérémoni a kafé, zò ké touvé an péyi Etyopi

Léta kolonyal fwansé désidé mèt anwout asi travayè Gwadloup davwa nèf lanné apré, tribinal a-y désidé kriyé militan a LiGTG kon Gabriyèl Bourgignon, Michèl Madasamy é Frèd Louise. Nèf lanné apré on zafè ki té rivé laSARA ola yo ka akizé sé militan-la yo té éséyé fouté difé laSARA menm! Ka fwansé po'o touvé pou éséyé fè nèg tonbé andalo? Alò sé kanmarad-la té'é fou pou yo té fouté difé laSARA? Nonsèlman yo té'é mò, onlo moun alantou a-yo té'é mò é tout Jarry té'é soté! Mé nou ja konnèt! Sé on jan pou léta kolonyal fwansé vanjé-y apré mouvman a LKP!

Nou patriyòt, fò nou kontinyé konba-la! Alò pou sa ki pé, sanblé-zòt douvan tribinal a-yo Lapwent dèmen vandrèdi a dézèd'laprémidi!

Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!

On drapo ki tini 208 lanné!

Nou té on jou a févriyé 1803 lè labann a Désalin é Pétyon désidé raché koulè blan a drapo fwansé-la. Kifè i rété enki wouj é blé-la é sé kon sa drapo a nasyon Ayiti vin kréyé. On drapo yo rann ofisyèl on jou 18 Mé 1803, swa hui mwa avan yo té pwoklamé lendépandans a péyi-la. Drapo-la tini 208 lanné!

Pèp Ayisyen kèlanswa koté i yé, ka fété jòdi drapo a-y. Dyaspora-la ki an Gwadloup pé ké manké fè-y! On sélébrasyon ayisyen ka natirèlman asosyé gwadloupéyen! Jou-lasa, moun kay manjé soup a jiwomon!

Magré tout tribilisayon péyi Ayiti ka sibi, drapo a nasyon-lasa ka rété doubout!

Sa ka montré nou pa bizwen nou atann nou vin endépandan pou nou ja ni on drapo! Sa sé ba sé patriyòt-la, an ka voyé sa!