Moun an Gwadloup dwèt suiv zafè-lasa asi jounal a "Guadeloupe 1ère" jédi pasé é zò pé suiv lki toujou asi bik entèwnèt a "Guadeloupe 1ère" osi. Jounal palé dè afilyasyon a Lagwadloup adan fédérasyon mondyal a taèkwondo. Sa an té palé zòt fen avril! E an té di zòt èvè ki drapo gwadloupéyen ké ay adan chanpyona di mond? Menm kèsyon jounalis pozé-yo adan jounal a jédi pasé? Èvè ki drapo nou ké ay? On manman kèsyon padavwa adan larèl politik-la pèp Gwadloup poko pwan pon kalté désizyon, politisyen poko pwan pon désizyon. Pa kont an sav lè ékip Gwadloup a taèkwondo kay adan konpétisyon an Karayib-la, i ka sòti èvè drapo a LiPLG!

Mi èvè drapo-lasa gwadloupéyen kay adan ripaj an Karayib-la é adan zòn panamérikenn-la!

Nòmalman kanmarad, mwa Mé sé zafè a solèy! E ben non kanmarad! Nou ja an mitan a mwa-la é nou pa jen ka vwè twòp jou a solèy, se enki lapli, lapli, lapli! Rékòlt a kann-la ké an pwoblèm davwa richès a kann-la ké bésé onlo! Agrikilti an-nou ké an pwoblèm mé sa pé ké anpéché gwadloupéyen kontinyé planté manjé, padavwa fò nou kontinyé planté manjé! Pa obliyé on péyi dwèt tini sékirité a manjé asi latè!

Mi on bèl biten pou kè a-zòt! Sa té pasé an Bèljik an 2008 an ka kwè! Bèljik, Fwans, Otrich, brèf kon nou ka di, a kaz a-yo chyen ka fè chat!

Mèsi Bondamanjak!

Gwoka é Nyabinghi ni

pwoblèm pou yo jwenn!

Ki jan nou pé konpwann Bob Marley té dékouvè gwoka-la an vant a bèt-la?* E poutan tini a penn dézè avyon antrè Gwadloup é Jamayik! Dèpi toujou nou té tini on pwoblèm a lyannaj èvè sé fwè a Karayib-la é nou ka kontinyé ni pwoblèm pou lyanné-nou! Sa pli fasil pou on gwadloupéyen ay an Fwans ki an Jamayik! Sa pli fasil osi ba on jamayiken ay an Anglètè ki an Gwadloup! On gwadloupéyen é on jamayiken ni menm listwa-la, yo toulédé sibi fwèt a lèsklavaj, jamayiken-la rivé sòti anba gyouk kolonyal-la alò kè Gwadloup toujou kolonizé! An ka kwè kolonizatè-la ka jwé on wòl adan sa! Fwansé ka toujou éséyé fouté baton an wou an-nou lè nou vlé komansé on lyannaj osèryé èvè sé fwè a Karayib-la. Si nou vlé lyanné, fò nou toujou pasé pa fwansé! E moun ka di Lagwadloup pa on koloni?

* Sé parapòt a Marcel Magnat èvè gwoup a-y "Toumblak" ki pa la ankò si "The Wailers" dékouvè mizik gwoka an vil Paris adan lélanné 70. Marcel Magnat an ka saliyé dayè!

Erika Aly rèprézanté péyi an-nou

Gwadloup adan élèksyon a mis

mond. Kon sa fwansé ké alèz a-yo

pou rèprézanté moun a-yo adan

élèksyon mondyal!

An kouté yè swa asi Canal 10, misyé Jòj Nandan palé. Misyé Nandan di on biten ki bèl menm. I di an 1992, fwansé pa pwan mis a-yo Corinne Coman pou élèksyon a mis mond é mis Linivè. Poukisa? Sé padavwa Corinne Coman gwadloupéyenn-la, té ti-bwen twòp nègrès ba yo! Alò zò ka tou konpwann, fwansé ké voyé on nègrès èvè on kòstim a matadò é kolyé-chou? E sé kon sa dèpi 2003, misyé Nandan désidé voyé on mis Gwadloup adan élèksyon a mis mond. Kon sa mis Gwadloup an-nou ké pé ay an matadò, dansé asi gwo-ka, bigin, i ké pé jous palé kréyòl, brèf i ké pé rèprézanté kilti, mès é labitid a péyi an-nou san pon kalté pwoblèm!

Gwadloup poko endépandan mé an ka kwè adan larèl a kilti é èspò, péyi an-nou dwèt rèprézanté-y limenm adan lèmond san pasé pa Lafwans! Zò pa dakò?