On pati a gwadloupéyen ka atann LKP ké fè menm biten ki an 2009 kivédi fouté on grèv jénéral ki ké diré 40, 50 oben 60 jou. Yo pèd fil a-yo padavwa kanmarad, fò pa zò konpwann LKP ké bay menm fotokopi ki an 2009, sa pa posib! Fò nou té fè grèv-la an 2009 mé aprézan mèt a mannyòk a LKP ja konpwann fò nou pasé adan on dòt dimansyon. Kréyé on sosyété paralèl èvè tala nou konnèt la. Kon di on moun nou konnèt, fò'w komansé endépandan pannan ou anba gyouk toujou!

2010 kay bout pou fè 2011 parèt alò kanmarad rété lyanné toujou asi radyo é jounal ki pa ka woulé an mwen larel ki sé lézòt-la, an vlé palé dè jounal "Patriyòt", "Nouvelles Etincelles", "Motphrasé", Radyo Gayak, Radyo Tanbou Banbou, CCN, Montraykreyol, Bondamanjak, Bworldconnection é....Gwakafwika Revolisyon!

Kenbé rèd pa moli, adan on dòt solèy an 2011!

Politisyen bwabwa vlé mété jénès Gwadloup

anba dalo!

Lirèl manti-mantè kon manti fèt toujou té ka di nou i toujou mété on lajan sèryé pou fòmasyon a jénès Gwadloup. E ben si zò kouté on rèsponsab a LiGTG asi Radyo Tanbou, zò ka konstaté ki moun ka rakonté pèp Gwadloup titim-bwasèk!

Mé si zò pa té ni tan kouté RTB jòd-la, zò pé toujou lyanné-zòt asi bik entèwnèt a LiGTG      http://ugtg.org/article_1398.html

Yo vlé pa réglé pon pwoblèm an péyi-la, sitou pwoblèm a jénès Gwadloup mé yo ka kontinyé fè konplosité anlè tèt a pèp Gwadloup. Yè adan kongré a-yo Bastè, sé bwabwa-la enki désidé apliké réfòm a gouvèlman fwansé èvè ti-bwen adaptasyon asi-y. Kivédi konm léta fwansé désidé sé enki 43 konséyé téritoryal pou Lagwadloup trapé, Lirèl é bannélo a-y vlé Sarkozy mété omwen 60 konséyé téritoryal é an plis di sa ti-Lirèl-la ka mandé yo mété on ti-gout pwopòsyonèl adan jan pou yo éli sé konséyé-lasa. Yo kay apliké réfòm a gouvèlman fwansé é alò pé ké ni konsiltasyon ankò. E sé sa Lirèl-la té pè la! Bwabwa-la té pè gwadloupéyen té di-y awa si on konsiltasyon té ka fèt aprézan menm! Lirèl-la ka véyé enki on sèl biten, plas a-y é ta zanmi a-y pou yo pé kontinyé malpwòpté a-yo asi do a pèp Gwadloup! Zafè pou okipé dè pwoblèm a jenn Gwadloup, a pa pwoblèm a-yo jistèman!

Mé pli bèl-la, sé bwabwa-la ka suiv réfom a fwansé é yo pa menm fouti sòti on pwojé gwadloupéyen. E poutan yo té mandé Sarkozy 18 mwa pou fè-y! Dèpî tan-la, sé mésyé travay? Awa, pannan 18 mwa, yo pa fouté anmèd! Gillot ka déklaré yè yo ké kontinyé travay asi pwojé-la apré élèksyon kantonal. An ka kwè nou ké rivé an 2014 é sé bwabwa-la pé ké sòti anmèd pwojé gwadloupéyen. Alò ki jan on moun vlé pwan sé kalté politisyen-lasa osèryé? A pa bwabwa?

Réglé pwoblèm a Lagwadloup pa zafè a-yo, zafè a pwojé pou divini a péyi-la nonplis!

Ki tan gwadloupéyen ké konpwann fò pa yo rantré adan maji a sé kalté salopri-lasa?

Nou pa ni lizin a zarm an péyi-la

Pannan bout a simenn-la otila gwadloupéyen té ka fété nwèl a-yo, dé jenn ti-boug té ka pèd vi a-yo an péyi-la. Ankò on fwa! Prèmyé-la pèd vi a-y a dézèd'maten "Petit Pérou" Zabim adan on aksidan loto.I té ni 25 lanné! Lòt-la touvé lanmò "Trioncelle" Bémaho aprédavwa i wousivwè on kout'kouto an vant a-y! I té ni 19 lanné! Asasen a-y té ki enki 17 lanné!

Alò lè an ka tann gwadloupéyen ka wouklé padavwa LKP té ké kyouyé nwèl a-yo, an ka di désidéman sé gwadloupéyen-lasa poko konpwann ayen! Adan 120 pwen é kèk a rèvandikasyon a LKP ni on larèl ola i ka goumé pou yo mèt si pyé on " plan d'urgence pour la formation des jeunes". Tousa pou jenn sòti an lari-la davwa lè ou an lari-la, ou ka trapé tout vyé mès ki ni. On jenn kyouyé on dòt jenn an mitan nwèl! Dé fanmi adan penn é tribilasyon! Mi foto a-y!

Kenbé rèd fwè

Kenbé rèd sitou pa moli

Kenbé rèd sitou pa tranblé

Kenbé rèd sitou pa pléré

Douvan misyé-la ka kenbé fwèt-la

(Mòso fè-la, Guy Konkèt)