Ekip nasyonal Gwadloup vis-chanpyon a Karayib-la 2010.

Rèspé ba yo!

Dèpi yè swa, ékip nasyonal an-nou vin vis-chanpyon a Karayib-la pou lanné 2010-la. Apré katriyèm plas i pwan an 2007 é twazyèm plas an 2008, Lagwadloup ka montré nou pwogwésyon a-y. Sé ti-boug Gwada-la té poutan démaré konpétisyon-lasa èvè on mannyè timid. Apré match a Giyana, ki moun ki té'é imajiné nou té'é rivé jis-la? Yè swa, Jamayik manké pa gannyé match-lasa! Sé èvè séri a pénalti ki sé on lotri,  jamayiken trapé plis chans ki nou pou yo pé gannyé final-la. Apré tounwa-lasa, plis ki janmen sé ti-boug Gwada-la mérité rèspé padavwa yo mougné mayo-la é yo défann péyi a-yo!

Aprézan, fò nou paré pou nou tini on ékip a zouti filé pou pwochen Gold Cup a CONCACAF-la!

Dèmen chanpyon ?

Dèmen oswè, tout gwadloupéyen opwès ké touvé-yo dèyè télévizyon a-yo pou vwè si ékip nasyonal foutbòl an-nou kay menné koup Digicel a Karayib-la an péyi an-nou!

Ba gwadloupéyen an péyi déwò, final-la (Gwadloup - Jamayik), zò pé kouté-y asi bik a RLDM é vwè-y asi ta CONCACAF-la.

Chanpagn-la, sé pou dèmen swè?

Yè swa toutmoun Gwadloup dwèt soufè douvan télé a-yo padavwa ékip nasyonal an-nou menné 1-0 douvan Antig pannan 49 minit + 4 minit arèd'jé! Imajiné si Antig té égalizé an bout a match, nou té fin chyé! Sé SO-LI-DA-RI-TE a jwè an-nou ki kenbé rézilta-la! On bèl woulo ba sé ti-boug Gwada-la ki ka voyé péyi an-nou adan twazyèm Gold Cup a-y (2007, 2009, 2011).

Pou plis kamo asi koup Digicel a Karayib-la, lyanné-zòt asi "Boul an Karayib-la" (http://caribbeanfoot.overblog.com).

Dèpi yè, ésans-la vin pli chè èvè on santim an plis. Dèpi lontan an ja vwè jé a-yo! Sé mésyé ka ban nou-y pa ti-mòso! Sé konsidiré ou té vlé ba on moun pwazon mé olyé ou bay tout, ou ka bay li pa ti-mòso! Mé lè ou ka ba on moun pwazon pa ti-mòso, moun-la pa oblijé mò, kò a-y ka plito rézisté, i ka gannyé plis fòs! Alò sa ou té ka èché la ou pa ka touvé-y! E ben sé menm biten èvè sé pwofitan-la an péyi Gwadloup. Sé mésyé konpwann lè yo ka wosé pri a ésans pa ti-mòso, pèp-la pé'é vwè ayen? Yo pèd fil a-yo davwa LKP ka véyé jé a-yo! E ti-Lirèl ka fè masko a-y, dapré-y i kont zafè a moun ka wosé pri a ésans!

Dènyé fwa-la an té ba zòt on kamo ola zò pé kouté tout sé match-la asi bik a RLDM mé zò pé vwè yo osi asi bik a CONCACAF-la. Alò pou sa fò zò komansé rantré asi bik a laFIFA, zò ka chèché "Confedérations" é zò ka kliké anlè-y. Apré zò ka kliké anlè "CONCACAF" é zò ka tonbé asi "Digicel Cup"-la. La, yo ké mandé zòt anrèjistré non a-zòt avan zò pé gadé sé match-la.

Gwadloupéyen ki an vant a bèt-la, lyanné asi nèt-la koté onzèd'swè pou zò pòté fòs-la ba sé ti-boug Gwada-la ki bizwen sa menm!