-
On pakèt kim, anmèd chokola adan-y!
Yo vlé pa réglé pon pwoblèm an péyi-la, sitou pwoblèm a jénès Gwadloup mé yo ka kontinyé fè konplosité anlè tèt a pèp Gwadloup. Yè adan kongré a-yo Bastè, sé bwabwa-la enki désidé apliké réfòm a gouvèlman fwansé èvè ti-bwen adaptasyon asi-y. Kivédi konm léta fwansé désidé sé enki 43 konséyé téritoryal pou Lagwadloup trapé, Lirèl é bannélo a-y vlé Sarkozy mété omwen 60 konséyé téritoryal é an plis di sa ti-Lirèl-la ka mandé yo mété on ti-gout pwopòsyonèl adan jan pou yo éli sé konséyé-lasa. Yo kay apliké réfòm a gouvèlman fwansé é alò pé ké ni konsiltasyon ankò. E sé sa Lirèl-la té pè la! Bwabwa-la té pè gwadloupéyen té di-y awa si on konsiltasyon té ka fèt aprézan menm! Lirèl-la ka véyé enki on sèl biten, plas a-y é ta zanmi a-y pou yo pé kontinyé malpwòpté a-yo asi do a pèp Gwadloup! Zafè pou okipé dè pwoblèm a jenn Gwadloup, a pa pwoblèm a-yo jistèman!
Mé pli bèl-la, sé bwabwa-la ka suiv réfom a fwansé é yo pa menm fouti sòti on pwojé gwadloupéyen. E poutan yo té mandé Sarkozy 18 mwa pou fè-y! Dèpî tan-la, sé mésyé travay? Awa, pannan 18 mwa, yo pa fouté anmèd! Gillot ka déklaré yè yo ké kontinyé travay asi pwojé-la apré élèksyon kantonal. An ka kwè nou ké rivé an 2014 é sé bwabwa-la pé ké sòti anmèd pwojé gwadloupéyen. Alò ki jan on moun vlé pwan sé kalté politisyen-lasa osèryé? A pa bwabwa?
Réglé pwoblèm a Lagwadloup pa zafè a-yo, zafè a pwojé pou divini a péyi-la nonplis!
Ki tan gwadloupéyen ké konpwann fò pa yo rantré adan maji a sé kalté salopri-lasa?
Tags : pou, pwoblem, bwabwa, lirel, pwoje
-
Commentaires
Sa maléré dè di mé sé la bann a fanmi annou lé ansyen ki pa ka suiv ditou é ki pa konèt ayen an politik kay voté
Malérèsman nou pé ké pé fè ayen pou konsyantizé sé moun-lasa
Kon-w ka di sa pa ka entérésé sé mésyé pwoblèm ki ni an péyi-la
Yo ka woulé pou entéré a yo é douvan élèksyon yenn a dé kouyonnad pou vèglé on pati a pèp-la