-
-
Solitid adan pantéon a fwansé? Awa!!!
Alò boug a lagè-la Hollande-la té di on jou fò plis moun rantré adan pantéon a-yo la an Fwans. On gwoup fanm an Fwans désidé fò léta fwansé mété plis madanm andidan pantéon-la. E sé kon sa yo désidé pòté kandidati a Solitid. Mwenmenm an-mwen, an ka di AWA!!! Pas Solitid goumé kont fwansé kon labann a Ignas, Dèlgrès, Masoto, Palèm, Kodou é konsò! I goumé kont fwansé pou'y té libéré Gwadloup kont sistenm èsklavajis é kolonyalis-la. E sé fwansé ki pann li apré. Alò an pon jan nou vlé Solitid rantré adan pantéon a-yo!
2 commentaires -
Ekip nasyonal Gwadloup adan chanpyona Karayib a ping-pong an péyi Sentlisi.
On bèl woulo ba fanm é nonm a ékip nasyonal Gwadloup adan chanpyona Karayib a ping pong ki ka fèt an péyi Sentl isi. Sé nonm-la é sé madanm-la bout asi twazyèm mach a podyòm pa ékip-la.
Aka sé nonm-la
1. Sendomeng
2. Trinidad é Tobago
3. Gwadloup
4. Sentlisi
Aka sé madanm-la
1. Giyana
2. Trinidad é Tobago
3. Gwadloup
4. Sendomeng
Ripaj-la ka kontinyé èvè rantré a sé senp-la.
votre commentaire -
Chart a Mandé, anprè Soundjata Keïta mété déwò an 1222.
Adan lékòl, télé, jounal é radyo a-yo, yo toujou fè nou kwè péyi Fwans maké an 1789 prèmyé déklarasyon a dwa a nonm. Mé tini ki sav a pa péyi Fwans padavwa an 1222 lanprè di Mali Soundjata Keïta mété déwò Manden Kaliken kivédi an lang malinké, Chart a Mandé. On chart zò pé vwè, mété-y si papyé é bay ba moun a-zòt asi :
www.afric-impact.org/AI/PDF/fiches_educatives/fiches_thematiques/96117.pdf
2 commentaires -
Lèsprikason 2013 ka sanblé moun a mas an péyi-la an vil Lapwent. Vandrèdi, sanmdi é dilmanch, sé èspozisyon a kòstim a mas an paviyon-la owa Plas Laviktwa. Asi Plas Laviktwa menm sé osi èspozisyon a tanbou a Mas, gwoka é bèlè. Sé animasyon èvè son a ka-la adan kyòs-la. Sanmdi oswè, sé konsè èvè gwoup kon Akiyo, Mas Ka klé, Mi yo é konsò. Dimanch koté katrè, sé gwan déboulé an lari Lapwent.
Adan tout sé gwoup-la ké a lendikatif prézan, nou ké ni on gwoup ki sòti an vant a bèt-la, non a-y MI YO é nou kay ni osi on gwoup Matnik San Chenn. Matnik? Wi, sé padavwa nou ni gwadloupéyen ki ni swa manman-yo oben Papa-yo ki moun Matnik. Alò sé gwadloupéyen èvè matiniké ki kréyé gwoup-lasa. Son a mas-la, lèspri a mas-la ka chayé moun toupatou, an di zòt!
votre commentaire