Nòmalman kanmarad, mwa Mé sé zafè a solèy! E ben non kanmarad! Nou ja an mitan a mwa-la é nou pa jen ka vwè twòp jou a solèy, se enki lapli, lapli, lapli! Rékòlt a kann-la ké an pwoblèm davwa richès a kann-la ké bésé onlo! Agrikilti an-nou ké an pwoblèm mé sa pé ké anpéché gwadloupéyen kontinyé planté manjé, padavwa fò nou kontinyé planté manjé! Pa obliyé on péyi dwèt tini sékirité a manjé asi latè!

Kowosòl é ponm-kannèl ka ba moun maladi a Parkinson? Ki kouyonnad

é sa ankò? An nou kontinyé manjé sa ki tan-nou!!!

Adan jounal a-yo "Fwansmanti" pou pa nonmé-y, yo maké Kowosòl té ké ba moun maladi a Parkinson. Alò si an konpwann byen on boug kon Mohamed Ali té ka fouté an kò a-y on pakèt kowosòl, a pa vré? An té'é byen vlé sav ka dòktè Henri Joseph ka pansé dè biten-lasa! Sé moun-la pa tini pon kalté prèv syantifik é yo vlé mal palé fwi an-nou. Pou ki biten yo pa ka di menm biten anlè fwi ki sòti lòtbò? Pou ki biten yo pa ka di "pomme" a-yo, "pèche" a-yo, "poire" a-yo ka ba moun maladi a Parkinson osi? An ka kwè ni on volonté pou fè gwadloupéyen pè! Ni on volonté pou fè gwadloupéyen lagé fwi a péyi a-yo pou yo ay manjé ta lòt-la! Dòktè Henri Joseph ki sé on syantifik ka di fò nou manjé fwi a péyi an-nou padavwa sé fwi-la nou ka manjé la sé médikaman! Wi sè é fwè Gwadloup, an nou kontinyé manjé sa ki tan-nou!

Raoul Jòj Nicolo (1923 - 1993), on gwan gwadloupéyen ki mété plizyè kannal adan on sèl pòs a télévizyon.

Si toutmoun asi latè ka chanjé kannal anlè télévizyon a-yo sé parapòt a on gwan gwadloupéyen. Non a-y Raoul Jòj Nicolo. Gwan nonm-lasa lagé nou on jou 7 avril 1993.

Gadé fòs é vitès a sounami é zò ké konpwann sé lanati ki mèt!

Pa jen obliyé sa pé rivé nou Gwadloup é an vlé sitou palé dè komin Moul!

Ewopéyen kapitalis fè moun koupé mangwòv komin Bémaho èvè konplosité a sé mè-la pou yo té pé sav fouté masòn asi tè Gwadloup. Mé lè pa ni mangwòv gadé sa ki pé rivé nou an péyi Gwadloup!