Lous pé ké ni glas

pou yo rété si sa

kontinyé kon sa!

Dèpi lanné 2011-la komansé, lapli, lapli si lapli! An plen mwa janvyé sè é fwè Gwadloup! Dèpi an asi latè, sé prèmyé fwa an ka vwè on biten kon sa! Moun a syans ka déklaré tan-la ka chofé plis dèpi moun asi latè ka fè on pakèt loto woulé é fè on pil lizin maché! Etazini sé péyi ola on pakèt loto ka woulé, pèp chinwa komansé woulé an loto osèryé é chonjé chinwa yo plis ki 1 milya moun. E nou ni osi zendyen ka vini! Ewopéyen kant a-yo ka kontinyé vyé mès a-yo kivédi dérèspèté nati-la. Alò fò pa nou sirpri lè tan-la ka déréglé kon sa!

Sé gwadloupéyen ka fouyé tè an péyi a-yo?

Yè swa andidan télévizyon a-yo, yo montré moun ka fouyé tè adan on sèksyon a komin Gozyé. Moun ka fouyé tè pou yo pé sav dékouvè biten ansyen séré adan-y, yo ka kriyé sa akéyològ. Ki moun ka fouyé tè an péyi Gwadloup? A pa gwadloupéyen! Sé moun ka sòti lòtbò, moun ka sòti an péyi Fwans! Pa ni gwadloupéyen ka fè étid an larè-lasa? Sa byen bèl nou chanté Lagwadloup sé tan-nou mé si sé pou nou lésé dòt moun fè tout biten an plas an-nou an péyi an-nou ki tan-nou, an ka di an pa dakò! On pèp ki pa ka kontrolé ayen an péyi a-y pa on pèp!