Vilaj KBM èvè lyannaj LKP òganizé yè swa on gwan sanblé ola yo té ka envité pèp Gwadloup dékouvè oben woudékouvè mofwazaj a pwodui agrikòl. Tou sa fèt adan on larèl a souvrènté a manjé. Padavwa on péyi ki pa ni souvrènté adan larèl-lasa pé pa ni on souvrènté politik osèryé.

Alò annou manjé sa péyi an-nou ka pwodui kon mango!

Mango, on fwi ki ni onlo fib ki ka nétwayé andidan tout boyo a-w. Ji a-y menm ka lité kont maladi yo ka kriyé kansè. Mango sé on fwi rich an vitamin A oben E.

Jòdi-jou sé sézon a mango. Alò gwadloupéyen, zòt  ki adan péyi a-zòt, pwofité dè pwodui a péyi a-zòt, manjé mango é tout dòt kalté fwi é légim!