Aprézan sè é fwè konbatan gwadloupéyen, Shaka pa ka kriyé péyi-la ki a kaz an-nou "léta kolonyal fwansé" mé byen "léta néo-kolonyal fwansé". Poukisa? Sé padavwa léta fwansé pa ka mèt lajan adan posésyon a-y kon avan. Zò pa'a tann fwansé ka di nou pwan lotonomi an-nou? E gwadloupéyen konpwann gouvèlman fwansé pé ké fè-y? Ki'y a dwat, a gòch oben an mitan, gouvèlman fwansé ka suiv sa moun a lajan ka di-y fè! Zò konpwann sé labann a Sarkozy, Fillon ka menné an Fwans? Awa, sé moun a lajan! Fwansé ni dòt chat pou yo bat! Yo pé ké okipé dè nou kon avan! Ki jan fè nou pa ka konpwann sa? Sa yo ka vizé pou nou sé fouté on gouvèlman gwadloupéyen yo ké gidonné dèpi Paris. Fwansé bizwen fè kon yo ka fè an Afwik. Kon an Afwik, fwansé ké pé chwazi. A dwat yo ni Marie-Luce Penchard é a gòch Jacques Gillot oben ankò Victorin Lurel.

Alò aprézan Shaka ké kriyé sa "léta néo-kolonyal fwansé"!

Menm adan jounal a-yo "Guadeloupe dènyé", jounalis ka touvé pa ni manblo pou alé-vini lari Lapwent mé ka ni manblo pou baré sendikalis! Yè swa manblo touvé mwayen fè grévis a EDF sòti asi pikèt grèv a-yo. Mé pa okipé-zòt, sa pa fè sé sendilkalis fè dèyè. Yo pa tonbé adan zatrap a pwovokasyon a léta néo-kolonyal fwansé mé yo ka toujou rété mobilizé. Dayè zò tann mèt a mannyòk a sendika CGTG palé asi RTB bomaten-la.

Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!

Afòs chèché ou ka fin pa touvé é menm si a pa sa ou té ka chèché! Kanmarad gwadloupéyen, an tonbé pa haza asi on vidéo éwopéyen ki ka palé dè péyi an-nou Gwadloup. Sété apré mouvman an-nou LKP.

Gadé é sitou kouté, zò ké apwann biten ki bèl toubòlman. Kon boug an-nou la Lirèl ki sé réyèlman on kouto a dé lanm, on tanbou a dé bonda! Sèlon i ka palé ba gwadloupéyen oben ba dòt moun, ou ka tann dé son diféran!

Pété chenn a alyénasyon-la,

on biten ki rèd an péyi Gwadloup.

An ka kouté bomaten-la jounal a RTB é an ka tann on madanm rèsponsab a "Etablissement Français du Sang" (EFS). Madanm-lasa ni labitid palé an téléfòn adan jounal a Janklòd é bomaten-la i sòti dé fwa an bouch a-y on mo ki fè mwen soté. I di dé fwa " Cet été" pou palé dè gwann vakans an péyi Gwadloup!!!

Menm si Gwadloup sé on koloni a fwansé, i pa ka touvé-y owa Senpyè é Miklon kan menm!!! Madanm-la ka kwè-y tèlman i an Fwans, pou'y Gwadloup tini menm klima-la. Gwadloup sé on péyi a chalè é an toujou konnèt dé sézon an péyi Gwadloup :  Karèm é livènaj !

Karèm-la ka komansé an févriyé pou'y bout an mwa jen-la é tout rèstan a lanné-la sé livènaj.

Sé sa an toujou di zòt, aprédavwa yo basiné moun èvè zafè a "métropole" san koloni-la ki kay èvè-y la, mi yo adan on zafè a "l'été".

Asimilasyon, alyénasyon, dé biten ka kyouyé on pèp!

Kouté rèdifizyon a jounal-la  an midi-la é oswè-la, zò ké tann li byen menm!

Kanmarad konbatan Eli Domota té an vant a bèt-la pa ni lontan. Kouté sa'y té ka di on jounalis fwansé, zò ké konpwann poukisa fwansé vlé toujou désidé ban-nou!