-
Bomaten-la, si on moun ka pasé Lapwent, i ké vwè onlo koté drapo wouj planté. Pouki biten-lasa? Sé padavwa drapo wouj-la ka rèprézanté listwa a péyi an-nou. Wi an 1801, gwadloupéyen lévé gawoulé kont sé kolon-la ki té ka koupé é haché an péyi-la. E sé kon sa gwadloupéyen sanblé pou yo fè on gouvèlman ki ta péyi-la menm. Pannan si mwa, gwadloupéyen té ka menné péyi a-yo, ékonomi a péyi-la té ka maché byen toubòlman. Sik té ka alé é vini asi pò a péyi-la. Chonjé an tan-lasa sik a kann té konsidéré kon pétwòl an tan-lasa! Nèg ka menné ékonomi a péyi Gwadloup, é ben sa pa té ka fè blan Fwans plézi davwa sé on richès ki té ka foukan anba men a-yo. E sé kon sa Napoléon Bonaparte é bannélo a-y désidé woufouté nèg an èsklavaj. Napoléon voyé pou fè biten-lasa Richepance ki èvè konplosité a Pélage désidé ataké larmé gwadloupéyenn-la. On lagè ki diré jous an mwa Mé-la ki bout èvè mò a gwan nèg kon Ignas, Dèlgrès, Masoto, Solitid é konsò. Tout sé konba-lasa kont rétablisman a lèsklavaj fèt èvè drapo wouj-la ké té an tèt a kòtèj. E sé drapo-lasa jòdi gwadloupéyen ka onoré an péyi-la.
Drapo wouj-la ki yonn
adan sé drapo-la ki pli ansyen
asi kontinan mériken-la.
On drapo a lit ki pli ansyen
Ki drapo ayisyen-la ankò ki parèt
li an 1803!
1 commentaire -
Gwoup B : Gwadloup - Bèmid 1-1
On rézilta désèvan!
Pou plis kamo, ay adan "Boul an Karayib-la" aka http://caribbeanfoot.over-blog.com
1 commentaire -
Bomaten-la jounal "Fwansmanti" maké adan on paj a èspò a-y "la coupe du monde comme moteur", on tit i mèt ba sé jenn foutbalè annou-la ki kay komansé on kalifikasyon ki dwèt menné-yo adan faz final a CONCACAF-la an péyi Gwatémala. E si sé jenn-la ka rivé an dèmifinal, mi la on pwoblèm kay pozé ba laFIFA! Ès Lagwadloup "département français d'outre-mer" kon yo ka di an gwan fwansé a-yo, brèf on péyi ki poko endépandan, ké pé jwé on faz final a koup di mond? On gwan manman kèsyon! Zò byen tini dé koloni a fwansé ki ka byen jwé konpétisyon a laFIFA kon Lakanaky oben ankò Polinézi mé sé péyi ki tini on dòt èstati politik ki Lagwadloup. Yo sé sa yo ka kriyé "Territoires français d'Outre-Mer". Dé péyi ki tini on drapo ki ta-yo é on chanté nasyonal ki ta-yo. Pou lèmoman péyi Gwadloup poko tini on drapo é on chanté ki ta-y ofisyèl! Sé vré, annou imajiné péyi Gwadloup kay adan on koup di mond é ka jwenn Lafwans pou on match. Ès yo toulédé ké prézanté-yo èvè menm drapo-la é menm chanté-la? On solisyon laFIFA pé touvé sé fè Lagwadloup prézanté-y èvè on drapo é on mizik olenpik. Mé sa té ké rèd vwè Lagwadloup té ké sèl ékip ki pa té ké ni on drapo é on chanté ki ta-y! Adan on konpétisyon kon lakoup di mond, ou ka touvé on majorité a péyi endépandan. E an ka di zòt èvè sé bwabwa politisyen-la nou tini an péyi-la, nou poko paré pou nou vin on léta. Mé listwa kay tèlman vit!
1 commentaire -
P.S.E. (1958 - 2010)
PSE, Patrick Saint-Eloi té ké ni jòdi-la jou 20 òktob 2010, 52 lanné! Malérèzman ba toutmoun ki té enmé-y, PSE lagé nou on jou 18 sèktanm 2010 (40 lanné apré Jimmy Hendirx). E wi, maladi pa ka jwé! Pou nou chonjé gwan nonm-lasa, yonn adan sé gwan mèt a mannyòk a gwoup "Kasav", an ka fè zòt gadé é kouté on vidéo èvè pawòl a-y, non a-y "Réhabilitasyon". PSE ki pa jen obliyé koté'y sòti!
Toutmoun-la ka di olokòs
Sé on krim kont limanité
Tout juif mété-yo tèt ansanm
Pou alé plédé kòz a-yo
Tribinal entèwnasyonal
Etidyé èstati Nirenbèw
Lo.N.U. fè gwan asanblé
Si yo li sé abilité
Ka nou ka fè?
Mi lòd établi ka pasé
Pasé lèsklavaj sou silans
Nèg sibi lémenm préjidis
Ka mandé réhabilité
Èskè ni dé pwa dé mèzi
On jistis a dé vitès
Lèsklavaj pasé sou silans
Sé on krim kont limanité
Ka nou ka fè?
Nou mandé
(Réhabilitasyon)
Nou mandé
(Réhabilitasyon)
Nou mandé
(Réhabilitasyon)
Lajistis nou kay sézi
(Woupwan-y dé fwa)
Sé on kri ka sòti lwen
Sé on kri ki ka sòti adan zantray an-nou
San koulé oooh
Sa fè nou mal oooh
Men jòdi lè a pléré fini
Sé on kri ka sòti lwen
Sé on kri ki ka sòti an fenfon Afwika
San an-nou oooh
Ou ozé vann la oooh!
Fò jòdi rékòlt-la sé tan-nou
Sé dépòwtasyon komandé
Lwa dè vi dè mò asi nou
Yonn dé tòrtuw sistématik
Mi sa ki pasé mézanmi
Mi lòd établi pa dakò
Dakò nou plédé kòz an-nou
Sé kè yo ka konsidéré
Kè nou nèg nou pa moun toujou
Ka nou ka fè?
Nou mandé
(Réhabilitasyon)
Nou mandé
(Réhabilitasyon)
Nou mandé
(Réhabilitasyon)
Lajistis nou kay sézi
(Woupwan-y dé fwa)
Anba chenn-la
Anba chenn a bato-la
Anba chenn-la (maré)
Anba kal a bato-la
(Woupwan-y dé fwa)
Anba chenn-la
Anba chenn a bato-la
Anba chenn-la (maré)
Anba kal a bato-la
Nou mandé
(Réhabilitasyon)
Nou mandé
(Réhabilitasyon)
Nou mandé
(Réhabilitasyon)
Lajistis nou kay sézi
(Woupwan-y dé fwa)
Nou mandé yonn moniman
Yonn moniman woy
Yonn moniman "à la hauteur du crime commis"
Nou mandé yonn moniman
Yonn moniman woy
Nou mandé réhabilitasyon
Nou mandé
(Réhabilitasyon)
Nou mandé
(Réhabilitasyon)
Nou mandé
(réhabilitasyon)
Lajistis nou kay sézi
(Woupwan-y dé fwa)
Lajistis nou kay sézi
Lajistis nou kay sézi
(Diks - Lovtans (2002))
3 commentaires -
Avan-yè oswè, moun touvé Cédric Cornélie pann a kaz a-y. Yo di sé té ké on pwoblèm a fanm. Zò ja konnèt, lè madanm ka lagé on nonm, pwoblèm a lenbé ka vin parèt! Mé an pa la pou jijé! Siklis Gwadloup ka pèd on jenn èspwa a péyi-la. On jenn ki té kouri dènyé lantou Gwadloup-la ola i té bout 67èm adan klasman jénéral-la. An ka voyé bon fòs ba fanmi a Cédric Cornélie é ba tout zanmi a-y!
Cédric Cornélie té ka woulé
adan klèb "Espoirs du Sud"
an komin Gozyé.
1 commentaire