Bomaten-la jounal "Fwansmanti" maké adan on paj a èspò a-y "la coupe du monde comme moteur", on tit i mèt ba sé jenn foutbalè annou-la ki kay komansé on kalifikasyon ki dwèt menné-yo adan faz final a CONCACAF-la an péyi Gwatémala. E si sé jenn-la ka rivé an dèmifinal, mi la on pwoblèm kay pozé ba laFIFA! Ès Lagwadloup "département français d'outre-mer" kon yo ka di an gwan fwansé a-yo, brèf on péyi ki poko endépandan, ké pé jwé on faz final a koup di mond? On gwan manman kèsyon! Zò byen tini dé koloni a fwansé ki ka byen jwé konpétisyon a laFIFA kon Lakanaky oben ankò Polinézi mé sé péyi ki tini on dòt èstati politik ki Lagwadloup. Yo sé sa yo ka kriyé "Territoires français d'Outre-Mer". Dé péyi ki tini on drapo ki ta-yo é on chanté nasyonal ki ta-yo. Pou lèmoman péyi Gwadloup poko tini on drapo é on chanté ki ta-y ofisyèl! Sé vré, annou imajiné péyi Gwadloup kay adan on koup di mond é ka jwenn Lafwans pou on match. Ès yo toulédé ké prézanté-yo èvè menm drapo-la é menm chanté-la? On solisyon laFIFA pé touvé sé fè Lagwadloup prézanté-y èvè on drapo é on mizik olenpik. Mé sa té ké rèd vwè Lagwadloup té ké sèl ékip ki pa té ké ni on drapo é on chanté ki ta-y! Adan on konpétisyon kon lakoup di mond, ou ka touvé on majorité a péyi endépandan. E an ka di zòt èvè sé bwabwa politisyen-la nou tini an péyi-la, nou poko paré pou nou vin on léta. Mé listwa kay tèlman vit!