Wi, ayen péké kon avan!

Si jou 14 désanm LKP pa ka wousivwè pon répons a léta kolonyal fwansé, konsèy jénéral, konsèy réjyonal é senten patron, nou ka rantré adan on mouvman osèryé! E nou pa sav ola sa ké bout! Magré tout pwopagann a-yo pou éséyé fè pèp Gwadloup fè dèyè kaz, an pé di zòt yè, nou té onlo, onlo, onlo! Moun ka jous di nou té plis ki 30 000 an lari-la. Magré osi lapli-la, gwadloupéyen rété doubout oka an lari-la! Wi, kanmarad, sé sa an toujou maké ba zòt, LKP sé on zouti filé an péyi-la! Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!

Dom-maji pa mété sijé-lasa mé www.fwanmanti.fr. mété-y li. On sijé ka palé dè kat lidantité Gwada-la. Kanmarad, fò nou toujou jété on zyé aka lèlmi é an ka di zòt kanmarad asi www.fwansmanti.fr, sé blan-la ka déchéné-yo léfwè! Kon pou kréyòl-la, yo ka maké bétiz asi bétiz anlè kat nasyonal an-nou. Si apré sa moun poko konpwann ki moun ki lèlmi an-nou (kolonyalis fwansé), nou péké jen konpwann ankò!

Mwenmenm Shaka, an ja las di an ké fè-y kat lidantité-lasa. Ki blan pa dakò, ka sa pé fè mwen? Mwenmen an-mwen, sèl mésaj an pé voyé ba sé kalté blan rasis-lasa sé "Kounya manman-yo!". (Sé blòg an-mwen, an ni dwa jiré!).

Sé sa nou ka montré yo oswè-la é démen mawdi Lapwent! Adan on kalbas sé dé kui ki ni! Lè moun pa ka rèspèté sa yo signé, lè politisyen pé pa réponn moun ki voté ba yo, sèl chimen nou pé pwan, sé chimen a lari-la. Sa tèlman vré kè nou vwè an péyi Fwans jan travayè ka fè pwès menm biten nou. Apré 26 òktòb, kay ké pasé? Pon moun pa gadèd'zafè! Mé antouka, konba-la ké kontinyé padavwa LKP la jistan pwofitasyon bout!

"La Gwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!".

Boris Carêne (Gwadloup)

chanpyon Karayib-la 2010!

A pa son a Fanswa Ladrézo mé klasman an-nou adan kous an lign a chanpyona Karayib-la bisiklèt ki té ka fèt an péyi an-nou. Boris carêne rivé prèmyé, dézyèm plas ba Frédéric Cornélie ki pèd fwè a-y Cédric simenn pasé é twazyèm plas-la sé pou Frédéric Théobald ki té gannyé lanné pasé. Èvè viktwa a Mickaël Clarico adan kontrèlamont-la yè, plis ki janmen péyi Gwadloup mèt a mannyòk a bisiklèt adan Karayib-la!

Sé madanm-la nonplis pa démérité. Té ka manké Sylvianne Théophile plis souf pou'y té gannyé kous an lign-la mé on bèl dézyèm plas ké konsolé-y kan menm!

Aaaah, an pé di an pasé on bèl bout a simenn! Sala, an ké chonjé-y tout vi an-mwen! An larèl a èspò, nou gannyé an bisiklèt é an foutbòl! On gwo manman mobilizasyon ka paré-y pou mawdi! E gwadloupéyen désidé woté ti-bwen lotorité fwansé tini anlè nou, kivédi gwadloupéyen désidé mété déwò on kat lidantité a nasyon Gwadloup.