Sa byen bèl vwè gwadloupéyen ka hélé woulo-bravo lè ékip nasyonal foutbòl a péyi-la ka rivé an final adan on ripaj foutbòl an Karayib-la mé an ka mandé-mwen on biten. Ès tini réyèlman on konsyans nasyonal an péyi Gwadloup? Padavwa sé menm moun-la ka kriyé woulo lè Lagwadloup ka gannyé, yo paré chiré chimiz a-yo lè Lafwans pa ka gannyé match! Yo pli fwansé ki fwansé-la limen! Sa sé travay sistenm kolonyal fè andidan kabèch a onlo gwadloupéyen dèpi nanni-nannan. Jamayiken, zò konpwann yo paré pou goumé pou sipòté Langlètè? AWA! Padavwa yo sav yo ka viv adan on péyi ki gannyé souvrennté a-y! Dèpi lanné 1962, Jamayik pa maré èvè Langlètè ankò! Alò lè on jamayiken ka sipòté on ékip nasyonal, i ka sipòté ékip nasyonal a péyi a-y. An péyi Gwadloup, nou maré èvè fwansé! Tèlman nou maré, nou alyéné, chonjé an tan ékip Gwadloup pa té ko ékip-la i yé la, jan gwadloupéyen té ozé pòté mayo é sipòté on klèb fwansé (Olympique de Marseille) kont séleksyon a péyi a-yo Lagwadloup! Mé érèzman nou té ni patriyòt Gwadloup ki désidé woulé ba péyi a-yo é enki ba péyi a-yo! Chonjé on gwan nonm, misyé Jacques Rugard ki fè péyi an-nou rantré LiFC é laCONCACAF. On travay prézidan aktyèl a lig foutbòl Gwadloup, misyé Guy Roch ka kontinyé fèt èvè èstaf tèknik a ékip nasyonal-la mésyé Roger Salnot, Jocelyn Angloma é Franck Louis. On travay ka pòté fwitaj a-y! An 2007 pou prèmyé vini a-y, Gwadloup té ka rivé an dèmifinal adan on gwan tounwa ki sé Gold Cup a CONCACAF-la. Dèpi rézilta-lasa on pakèt gwadloupéyen woumèt-yo ka sipòté onlo ékip nasyonal a-yo. Alè-la yo ka vwè pa tini enki ékip nasyonal fwansé,tini osi ta Gwadloup. Pou lèmoman nou poko ka jwé koup di mond mé an ka èspéré sa ké vini. Alò on konsyans nasyonal ka lévé an péyi Gwadloup? Pétèt mé fò konsyans-lasa té ké mofwazé adan larèl a sosyété pli an jénéral é sitou adan larèl politik-la. Fò gwadloupéyen mété an kabèch a-yo, yo ka viv adan on PEYI, yo sé on PÈP, yo ka fè on NASYON ki pou lèmoman poko tini on LETA!