On blòg an lang gwadloupéyen ka lyanné péyi Gwadloup èvè réjyon Karayib-la é kontinan afwiken-la.
Jòd-la an ka apwann aka sé fwè-la Bondamanjak, "Pôle Emploi" té ké rèfizé on chèk maké an brèton! "Pôle Emploi" té ké mandé man Ana Sohier maké-y an fwansé. Poutan sè é fwè Gwadloup, chèk-la té préyenprimé an brèton menm. Zafè-lasa komansé fè onlo wélélé an Fwans é adan lèmond (padavwa ni entèwnèt), "Pôle Emploi" té oblijé mandé man Ana Sohier padon!
Gadé sa sè é fwè Gwadloup, Labrètagn an plen Fwans é poutan brèton ka mèt tout lidantité a-yo déwò! Drapo a-yo, chanté nasyonal a-yo é lang a-yo yo ka voyé monté! Pa kont an péyi Gwadloup, nou poko rivé an menm nivo ki sé brèton-la. Péyi Gwadloup ka touvé-y a 8 000 kilomèt dè Lafwans, nou lòt koté-la é poutan ou ka touvé déotwa gwadloupéyen ki pli fwansé ki fwansé-la limenm! Zò vlé rété fwansé mé chonjé zò gwadloupéyen dabò pou yonn èvè on kilti, èvè mès é labitid ki ta zòt fwansé kolonyalis bizwen fè nou pèd!
Lang Gwadloup maké toupatou an péyi-la sé on rèvandikasyon a Lyannaj Kont Pwofitasyon! Alò pouki biten nou pé pa imajiné on chèk Gwadloup maké an kréyòl é kè nou ké pé maké adan lang a manman-nou osi lè nou ka péyé zafè an-nou?
Mi foto a-y sè é fwè Gwadloup!