On blòg an lang gwadloupéyen ka lyanné péyi Gwadloup èvè réjyon Karayib-la é kontinan afwiken-la.
Fizi an péyi-la é moun ka touvé sa
nòmal?
A inè-la, moun ka apwann an péyi Gwadloup, dé jenn fanm pwan bal fizi Lapwent. Yonn pwan on bal nonm a-y tiré si-y Karénaj é on dòt pwan plon Lasénisman. Prèmyé-la malérèzman mò lopital é dézyèm-la, vi a-y pa an danjé.
Ankò on fwa, moun ka kontinyé pwan bal fizi an péyi-la. Lòtjou, sé dé nonm yo té touvé mò èvè bal fizi, yonn asi réjyon Kapèstè, lòt-la asi réjyon Gozyé. Konmen tan sa ké kontinyé kon sa? Nou pa ni lizin a fabrikasyon fizi mé on pakèt a sé biten-lasa ka alé é vini an péyi-la. E ki moun ka plis pri adan sa? Nèg! Sé kon adan sé géto-la an Amérik ola blan fouté fizi ba nèg pou'y tiré asi dòt nèg kon-y! E yo di politisyen Gwadloup fè kongré asi lavyolans lanné pasé? Fò kwè sa pa sèvi ayen piskè nèg ka kontinyé tiré asi dòt nèg an péyi-la.
Pannan sitan blan-la an péyi annou ni fizi osi mé a pa pou'y tiré anlè blan kon li mé sé plito pou i ay ataké nèg si on révolisyon osèryé ka fèt an péyi-la.
Fizi ka palé fwansé an péyi Gwadloup é pon moun poko paré pou anpéché sé biten-lasa fèt!