Roch Wamytan é Oscar Temaru kay menné péyi

a-yo asi chimen a lalibèté?

Listwa pa ka fè dèyè é an ka èspéré sé douvan i kay. Dé endépandantis pwan pwès an menm moman-la tèt a péyi a-yo an Kanaky é an Polinézi. Roch Wamytan (UC-FLNKS) pou Kanaky é Oscar Temaru (UPLD) pou Polinézi. On bèl nouvèl toubòlman! Mé an ka èspéré sé dé gwan nonm-lasa pé ké lésé fwansé pyéjé yo kon yo té pyéjé misyé Alfred Marie-Jeanne Matnik. Pawti a Marie-Jeanne (MIM) rété 12 lanné an tèt a réjyon Matnik é péyi-lasa, pa menm lotonòmi i pwan. Pétèt asi Letchimy, Matnik ké vin otonòm mé biten-lasa dwèt ké fèt an dé tan. Awtik 73-la avan é apré ta 74-la.

Èvè mésyé Wamytan é Temaru, ès Kanaky é Polinézi ké pwan chimen a lémansipasyon? Nou ké la pou nou vwè!

Tini nèg ki pé ké jen sòti

adan kondisyon a-yo!

On dénonmé Olivier Bique (davwa non a-y maké asi nèt-la) ka mandé moun signé on pétisyon ola i ka mandé fwansé mété zouk an-nou adan mizik a-y. Ka nou pé konpwann? Si moun konpwann LKP té ja fè tout nèg pwan konsyans, yo lwen menm davwa ka rété on pakèt nèg ka rété kontaminé. Mi on prèv ankò fwansé ka konsidéré nèg adan koloni a-y kon moun étranjé é nèg-la ka vin pléré ba mèt a-y! Ki tan nou ké sòti adan sa?

Zò pé vwè-y asi bik a "Bondamanjak".

Yo wosé pri a ésans,

gwadloupéyen ka pléré

ba LKP?

Jòdi-la yo voyé on fo pwason davril! Vandrèdi 1é avril, moun ka péyé ésans-la pli ho ankò! Menm biten pou boutèy gaz-la! Nou ja konnèt sé lamafya ki la! Déotwa moun isi ka mandé ka LKP ka fè! Nou té désann an lari an mwa désanm pasé-la pannan dé jou. Moun isi té ka mal gadé nou! Moun isi té ka di LKP té ké kyouyé nwèl a-yo! Aprézan sé menm moun-lasa vlé LKP vin a soukou a-yo? Mwen ki té ké LKP té'é réponn yo : " E ben si zafè a-zòt mélé, désann an lari-la é mwen ka gadé zòt!". Lè zafè a-yo ranjé yo pa konnèt vou mé lè zafè woukomansé vin mélé yo ka pléré ba-w!".

Si zò kouté jounal a RTB bomaten-la é an midi-la, zò tann jan on fwansé bizwen fè lalwa an komin Bouyant. Zò ja sav sé moun-lasa tini zanmi jandam, jij a-yo an péyi-la! E moun ka di lagwadloup pa ka maché kon on koloni!

Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!