18 òktòb 2010, blòg Gwakafwika Revolisyon té ka parèt! On mwa apré ba a 1000 lyannaj pasé! Mèsi pou fòs-la zò ka ban-mwen la!

(Pati a gòch pou zò ay a dwat!). Stéphane Auvray (Gwadloup),

George Dublin (Antig é Bawbouda), Anthony Modeste(Grènad),

Clyde Leon (Trinidad é Tobago), Heine Colome Valencia (Kiba),

senk kapitenn ki ké éséyé menné ekip a-yo asi chimen a laviktwa!

Sé jòdi-la an péyi Matnik, hui nasyon a Karayib-la kay férayé adan on ripaj yo kriyé "Digicel Caribbean Championships". On ripaj foutbòl ki ké komansé èvè Trinidad é Tobago - Kiba (Fòd'Fwans a 18 PM) pou bout on dimanch 5 désanm jou a final-la (toujou Fòd'Fwans) èvè on tit a chanpyon a Karayib-la. On ripaj ki ké sèvi osi pou voyé kat ékip a Karayib-la adan pwochen Gold Cup a CONCACAF-la ki ké jwé lanné 2011-la an péyi Etazini (5 jis 25 jen).

Ekip nasyonal an-nou Gwadloup ké natirèlman a lendikatif prézan pou'y chèché kalifikasyon a-y pou Gold Cup-la é pou'y éséyé osi pwan tit a chanpyon a Karayib-la. On tit nou poko jen trapé dèpi...1948! Dèpi nanni-nannan!

Pou zò pé ba sé ti-boug Gwada-la on fòs, mété douvan-douvan koulè wouj, jòn é vè-la a kaz a zòt, adan loto a-zòt, kèlanswa koté zò yé! Davwa sé ti-boug Gwada-la ka jwé adan sé twa koulè-lasa ki ka rèprézanté nasyon Gwadloup!

Match a Lagwadloup

Sanmdi 27 novanm : Gwadloup - Giyana (Rivyè-Pilòt a 17 PM)

Lendi 29 novanm : Gwadloup - Jamayik (Rivyè-Pilòt a 20:30 PM)

Mèkrèdi 1 désanm : Gwadloup - Antig é Bawbouda (Rivyè-Pilòt a 18 PM)

Pou plis kamo asi ripaj-lasa lyanné zòt asi Boul an Karayib-la (http://caribbeanfoot.overblog.com)

Ki jan pèp-la té sav té tini on mobilizasyon lapòs kapèstè Bélo? Sé parapòt a RTB ki bay lavwa, ki pèwmèt travayè lapòs Kapèstè palé pwoblèm yo ka kontré andidan-la. Radyo yo ka kriyé ofisyèl kon RCI é RFO pa jen palé dè mobilizasyon-lasa. Poukisa? Sé padavwa zò tout sav dèpi mouvman a LKP-la, sé mésyé touvé-yo plis pè sendikalis ankò! RCI sé radyo a kapitalis pwofitan béké! RFO sé radyo a léta kolonyal fwansé. Dé lèlmi a LKP, dé lèlmi a pèp Gwadloup! Sèl radyo ki pé ba pèp-la palé, zò ni Radyo Gayak é sitou Radyo Tanbou Banbou, radyo a pèp-la!

Mawdi ki pasé la, lokatè an réjyon Zabim-Lapwent  désidé baré chimen-la owa "La Régie des Eaux", koté la RFO té yé avan. Pouki biten? Sé padavwa misyé Rousseau ki sé pòt-pawòl a lokatè jijé sé lokatè-la ka péyé twòp dlo. Sé lokatè-la ka péyé dlo yo pa ka konsomé! A pa pété bwa yo ka kriyé sa? Sé moun-la ka jéré dlo-la ba sé lokatè-la mo pou 16 désanm. Nou ké la pou nou vwè!

Sé gwadloupéyen ka fouyé tè an péyi a-yo?

Yè swa andidan télévizyon a-yo, yo montré moun ka fouyé tè adan on sèksyon a komin Gozyé. Moun ka fouyé tè pou yo pé sav dékouvè biten ansyen séré adan-y, yo ka kriyé sa akéyològ. Ki moun ka fouyé tè an péyi Gwadloup? A pa gwadloupéyen! Sé moun ka sòti lòtbò, moun ka sòti an péyi Fwans! Pa ni gwadloupéyen ka fè étid an larè-lasa? Sa byen bèl nou chanté Lagwadloup sé tan-nou mé si sé pou nou lésé dòt moun fè tout biten an plas an-nou an péyi an-nou ki tan-nou, an ka di an pa dakò! On pèp ki pa ka kontrolé ayen an péyi a-y pa on pèp!