On blòg an lang gwadloupéyen ka lyanné péyi Gwadloup èvè réjyon Karayib-la é kontinan afwiken-la.
Gwadloupyén lagé katkat-la pou on "Twingo" si zò
vlé pa péyé twòp ésans!
Jòdi-jou gwadloupéyen ka kriyé anmwé padavwa tout biten òkmanté. Esans-la, manjé-la, dlo-la, kouran-la, téléfòn-la kisisi kisila. Gwadloupéyen, lè 20 000 moun té an lari-la Lapwent désanm pasé sété pou fè zòt chyé? 20 000 gwadloupéyen kon zòt té ka mandé moun rèspèté akò yo té signé èvè LKP, zò pa'a chonjé sa? Aprézan moun ka jis mandé ka LKP ka fè! Mé zòt menm, ka zò ka fè? Sé pwofitan-la, lè yo ka vwè moun ka achté gwo katkat, yo ka mèt anwout pou yo òkmanté ésans-la! Lè gwadloupéyen ka kontinyé achté adan gwan magazen a sé béké-la, sé pwofitan-la pa ka pèd fòs! Gwadloupéyen, fò nou apwann viv èvè sa nou ni, fò pa nou mò pou sa nou pa ni! Wouvè zyé an-nou gwan tonnè! Pou ki biten gwadloupéyen bizwen fè-yo vwè? Ou ké péyé dènyé gwo katkat-la ki sòti é apré ou pé ké ni pon lajan pou achté on mòso pen! Pisimyé on moun achté on "Twingo" ki pa ka manjé twòp ésans plito i ay dépansé on pakèt ésans!