Dèmen koud'boul-la ka pati an Afwik

Giné Ekwatoryal - Libi ké match-la ka wouvè dèmen 28èm koup a sé nasyon afwikenn-la ki kay jwé an péyi Gabon é Giné Ekwatoryal. On ripaj foutbòl ké bout jou a final-la on jou dimanch 12 févriyé adan èstad Libreville an péyi Gabon.

On koup dafwik pou prèmyé fwa ké vwè on pakèt gwan ékip ki pé ké a lendikatif prézan. Kamroun pé ké la ( Sénégal éliminé-y), Nijérya pé ké la (Giné éliminé-y), Afwik di Sid pé ké la (Nijè éliminé-y), Aljéri pé ké la  (Mawòk éliminé-y), Kongo-Kinshassa pé ké lé nonplis (Sénégal éliminé-y) é sitou chanpyon an tit-la Ejipt ké manké konpétisyon-lasa (Nijè sòti-y).

Mé magré absans a sé gwan nasyon-lasa, onlo dòt ké a lendikatif prézan. Kòtdivwa (chanpyon an 1992), Gana (kat fwa chanpyon), Mawòk (chanpyon an 1976), Tinizi (chanpyon an 2004), Sénégal (finalis an 2002 é kadèfinalis a koup di mond 2002!), Mali, Angola (ki té jwé lakoup di mond 2006 an Almagn).

Twa péyi kay dékouvè konpétisyon-la pou prèmyé fwa a-yo : Giné Ekwatoryal, Nijè é Bòtswana.

Sé gwoup -la

Gwoup A : Giné Ekwatoryal, Zanbi, Sénégal, Libi

Gwoup B : Kòtdivwa, Angola, Birkina Faso, Soudan

Gwoup C : Gabon, Tinizi, Mawòk, Nijè

Gwoup D : Gana, Giné, Mali, Bòtswana

On ripaj foutbòl zò ké pé suiv an dirèk andidan télévizyon a-zòt anlè "EUROSPORT", "CANAL + SPORT", "Guadeloupe 1ère"...