A pa ti-enmé fwansé ka touvé-yo enmé ti-ayisyen!

Gadé sé kalté ipokrit-lasa!

Fwansé ka fè gwadloupéyen kouri dèyè ayisyen é an menm balan-la fwansé ka wousivwè ti-ayisyen a kaz a-yo. Ka nou pé konpwann? An vlé byen kwè déotwa fwansé tini bon kè mé fò pa yo fè moun bwè dlo mousach pou lèt! An ka plito kwè sé on kalté pwopagann léta fwansé ka mété on fwa douvan-douvan pou sové limaj a-y. Aprédavwa yo montré jan gouvèlman fwansé ka voyé wòm a kaz  a-yo, i bizwen sové lafas. Alò i ay chèché biten a sé ti-ayisyen-la pou'y sové kapotaj a-y! Mé fò pa pon moun fè mwen kwè fwansé sibitman mété-yo ka enmé nèg kon sa! Sé ti-moun-lasa, ka yo ké sèvi an péyi a blan-la? Ni sa ké sèvi domèstik, èsklav menm! Ni sa ké sèvi biten sèksyèl ba moun! Ni sa ké pétèt menné on vi nòmal mé konmen adan yo? E sitou, an senten ni onlo adan sé ti-moun-lasa ki ni manman-yo é papa-yo toujou! A pa kon sa yo té kenbé on mérikenn ki té kay fè trafik a ti-ayisyen? Ès a pa sa fwansé komansé fè? On trafik a ti-ayisyen! E ki moun ki dwèt dèyè trafik-lasa? On dénonmé Bernard Kouchner, on boug koté i pasé ka fouté kaka aka lézòt!

Gwadloupyén, pa rantré adan sinéma a léta fwansé!