On blòg an lang gwadloupéyen ka lyanné péyi Gwadloup èvè réjyon Karayib-la é kontinan afwiken-la.
17 jen 2007, Gwadloup té ka kréyé on bèl
sirpriz douvan Ondiras. Viktwa 2-1!
Zò dwèt tann li osi adan jounal a Jéra asi RTB bomaten-la. 17 jen 2007, jou a fèt a tout papa, ékip nasyonal Gwadloup té ka kochi bèk a Ondiras 2 bi a 1 an kadèfinal a Gold Cup a CONCACAF-la. Pou prèmyé vini a-y adan konpétisyon-la, Gwadloup té ka kréyé sansasyon-la an péyi Etazini.
Sé jou-lasa on dénonmé Victorin Lirèl té ka désidé voyé on chartè pou dèmifinal-la on fwa match-la té bout. On boug ki di lè'y té pwan Laréjyon, man Micho té lésé-y an défisit é èvè on lopérasyon a sentèspri, Laréjyon an men a Lirèl wouvin rich an mwens ki twa mwa. I fò boug annou-la! Annou imajiné si sé ti-boug Gwada-la té rivé an final, sé twa chartè i té voyé an plis Chicago.
17 jen 2007 ka sanm nou lwen aprézan padavwa an lanné 2011-la, sé ti-boug Gwada-la pa rivé pasé prèmyé tou.
Dèmifinal an 2007, kadèfinal an 2009, éliminé adan prèmyé tou an 2011. Ekip nasyonal Gwadloup dwèt woukonstwi-y. Sa ké fèt san Roger Salnot antrénè-la. Sé sa menm prézidan a LGF Guy Roch déklaré. Alò ki moun pou pwan suit a misyé Roger Salnot? Richard Albè? Jocelyn Angloma?
Pou ban nou konsolasyon, an nou chonjé 17 jen 2007. On moman istorik ba foutbòl an-nou.