Lendi swa, an té ka gadé jounal a-yo adan "Guadeloupe 1ère" é yo vin adan larèl a èspò-la. Yo té ka palé asi jenn gwadloupéyen ki té ay adan chanpyona fwansé a surf. Zò sav ki moun ka fè èspò-lasa an péyi Gwadloup, sé on majorité blan. Tini déotwa nèg mé majorité-la sé blan. Sa ni enpòtans a-y padavwa yo montré on biten ki fè mwen soté! Ka yo montré? Yo montré sé jenn surfer-la té ka pozé douvan kaméra é aparèy foto. Ka yo té ni an men a-yo? On drapo. E ki drapo? Drapo a...LiPLG! Wi mésyé drapo a LiPLG toutmoun asi latè ka rèkonnèt kon drapo a nasyon Gwadloup. An soté padavwa yo toujou fè nou kwè òganizasyon endépandantis kon LiPLG oben MPGI té òganizasyon rasis. Ba onlo sé òganizasyon-lasa té ka mandé fouté tout blan déwò alò kè yo toujou di sé léta fwansé fò moun té mété déwò. A pa menm biten! E la adan jounal a-yo, yo ka montré on majorité blan ka pozé èvè drapo a nasyon Gwadloup. Sé moun-la pa ka fè politik mé yo ka jijé drapo-lasa ka rèprézanté péyi a-yo. E wi kanmarad, ki zansèt an-nou sòti Lafwik, Léwòp, Lazi oben Lamérik, nou tout gwadloupéyen!
Antouka sa fè mwen ri osi padavwa kaméra pasé floup lè yo montré sé jenn-la èvè drapo an-nou. Mé toutmoun ni tan vwè-y!
Alò lè an ka vwè déotwa nèg isidan èvè drapo fwansé, an ka di lèspri an-nou maré toujou. Mi blan ka di zòt mi drapo a-zòt!
Si zò pa'a kwè mwen, gadé rèdifizyon a jounal a-yo aka bik entèwnèt a "Guadeloupe 1ère" (jounal a 31/10/11 a 16 min 35 s).
/https%3A%2F%2Fassets.over-blog.com%2Ft%2Fcedistic%2Fcamera.png)
/http%3A%2F%2Ft2.gstatic.com%2Fimages%3Fq%3Dtbn%3AANd9GcRyOZVQ4oMDC08TJ3AnOqOtJcB_wfz6vWZNCRkcS1R0pCCo14YgsA)
/http%3A%2F%2Fupload.wikimedia.org%2Fwikipedia%2Fcommons%2Fthumb%2F9%2F91%2FKirani_James_Daegu_2011.jpg%2F200px-Kirani_James_Daegu_2011.jpg)
/http%3A%2F%2Ft1.gstatic.com%2Fimages%3Fq%3Dtbn%3AANd9GcQ5nYLFd4M1QjuAG3YtvrN07sSMHKWEolywX0KAq3C5X2CAYuV3)