On bèl fòs ba Laila !

Si zò ka kouté nouvèl a RTB, zò ké tann délè Janklòd ka fasadé an téléfòn-la èvè on madanm ki adan lélanné 80 té mélé èvè léta kolonyal fwansé. Non a-y Laila Cassubie! On madanm militan a lakòz nasyonal ki fè lajòl ba pèp Gwadloup kon onlo patriyòt a péyi-la. Kèk lanné apré fwansé ba sé militan-la lawmisitis, man Laila Cassubie ka véyé jòdi-jou asi fanmi Gwadloup ki an pwoblèm. Davwa fò sé moun-la ki pa vlé vwè òganizasyon kon LKP konpwann a pa pas yo ka bonbansé an sistenm-la, tout gwadloupéyen ka bonbansé kon yo! Ou tini an péyi-la on pakèt fanmi an mizè! Menm lè yo ka woulé yo pa ka rivé sòti kò a-yo an kabouya-la. Lè'w péyé lwayé é tout kalté chaj, pa ka rété-w apré ayen pou bwè é manjé, pou lévé ti-moun a-w osèryé! E sé pou sa man Laila Cassubie ka résèvé tan a-y pou okipé-y dè fanmi an difikilté. Alò lè zò ka tann li asi RTB pou mandé pèp-la bay on fòs, zò dwèt ba madanm-lasa waka*!

* waka : sé lè ou ka bat lanmen ba on moun ka fè bon aksyon.