Fwansé ka frenné nou!

Jamayiken mèt é sényè an atlétizm adan Karayib-la. Yo trapé

77 méday (!!!) adan dènyé CARIFTA GAMES-la Bèmid.

An tan kè ansyen èspòtif, an pé di zòt jan an ni onlo lanmou é  réspé ba on péyi kon Jamayik. Imajiné-zòt péyi-lasa trapé...77 méday adan dènyé CARIFTA-la ki fèt pannan vakans a pak-la Bèmid. Nou gwadloupéyen nou kontan pas nou rivé trapé 6 méday mé yo yo trapé 77! E a pa menm rèkò-la padavwa an 2004, Jamayik té trapé 84 méday.

Sé vré nou pé pa konparé Gwadloup é Jamayik pas Gwadloup poko on péyi endépandan, i toujou maré èvè léta fwansé. An ka chonjé an 1986, jan léfwè Théophile té ka kraché difé adan CARIFTA-la èvè mayo a nasyon Gwadloup anlè zépòl a-yo. On fwa yo mété-yo ka kouri ba Lafwans, yo pa jen bay bon rézilta apré. Wi andéwò dè Marie-José Pérec, pa ni onlo gwadloupéyen ki pèsé pli ho! Poukisa? Sé padavwa léfwè Théophile pa té ni  antrénè Gwadloup ankò, yo té tini antrénè fwansé. Sé padavwa osi yo pa té an menm kondisyon ki adan péyi a-yo Gwadloup é sitou, yo té ka kouri pou on péyi ki pa ta-yo! Ès sé ka a jamayiken? Awa pas on boug kon Usain Bolt avan i té chanpyon olenpik é di mond, kouri adan CARIFTA-la osi. Dayè tout sé chanpyon-la oblijé pasé pa la. Gwo diférans-la èvè nou Gwadloup, jamayiken, bahaméyen oben trinidadyen on fwa yo monté adan katégori sényò-la, yo ka kontinyé kouri ba péyi a-yo! Yo pa ka kouri ba Langlètè! E wi, fwansé ka frenné nou! Annou imajiné Gwadloup té pé woulé bay adan chanpyona di mond oben Jé Olenpik, nou té ké pétèt douvan Jamayik!

Menm biten pou foutbòl-la. Si Gwadloup té ka trapé menm kondisyon ki Jamayik oben Trinidad pou fè préparasyon a-y, i té ké mèt é sényè andidan Karayib-la é pétèt menm andidan CONCACAF-la. Mé ankò on fwa, adan larèl politik-la, gwadloupéyen vlé pa séparé-yo plis ki sa dè fwansé! Wi, fwansé ka frenné nou!