Apré drapo-la, giyanè gannyé imn a-yo

Kanmarad, an ka kwè si politisyen pa menm fouti chwazi on drapo nasyonal ba péyi an-nou, sé èspòtif-la ja fè-y! A pa pou ayen mésyé si an mété taèkwondo é surf a lendikatif prézan. Wi mésyé, pou rèprézanté péyi Gwadloup, sé drapo-lasa yo chwazi davwa asi nèt-la menm sé-y ou ka vwè. An ja palé dè pwoblèm-lasa ba misyé Alain Sorèze ki prézidan a CROSGUA. E wi, si nou kay rèprézanté nasyon Gwadloup adan konpétisyon ka fèt adan zòn jéogwafik an-nou, fò nou ni on drapo é on chanté nasyonal ki tan-nou. An ka kwè a pa Lafwans nou kay rèprézanté kan menm! Alò si nou ka pwan ka a taèkwondo-la, lè Gwadloup ké fasadé èvè Lafwans adan on chanpyona di mond, sé ké èvè on drapo fwansé? Awa piskè ou ka byen vwè adan blòg an-mwen, an ka montré délégasyon gwadloupéyenn-la ki té adan tounwa entènasyonal-la Paris èvè drapo gwadloupéyen-la.<br /> Si politisyen Gwadloup vlé pa fè travay-la, sé èspòtif-la ké fè-y an plas a-yo! <br />  

Annou pwan mal an-nou an pasyans mé zanmi, chak biten ka fèt a lè-ay. Nou ja ni dépi swasanttrèz chan a misyé lokèl é an démilnèf nou vin konèt on dòt zouti ki akonpagné patriyòt o konba pandan 44 jou. Sé chanté a misyé jacky richard. Drapo dèyè pòkò mannyé, mé sé on sèl ki ka rété ofisyèl(wouj jòn ver) san pousa di mal dé zòt. Alò ansanm ansanm nou ké pwan on désisyon pou sav ojis ki séla nou kay chwazi !