Sa ka fè zòt chyé?!!

Misyé André Jean-Vidal-la maké adan jounal "Fwansmanti", kominis bizwen lendépandans ba péyi Gwadloup pou fè-y an réyalité rantré adan on dòt kalté dépandans. Kivédi kon péyi Domnik, chinwa é mériken té ké kolonizé Lagwadloup. Ka nou pé konpwann adan sa? Mériken é chinwa ka kolonizé Domnik?  Domnik endépandan dèpi 1978 é kon on péyi endépandan, Domnik ka chwazi péyi i bizwen fè konmès èvè-y! Jòdi-la Domnik ka woulé èvè Lachin mé on jou i pé désidé kaskòd èvè Lachin é mété-y èvè Tayiwàn. Nou adan péyi an-nou, nou pé pa kaskòd èvè fwansé davwa nou toujou maré! Fwansé ka fouté pèp Gwadloup on pakèt timtim-bwasèk pou nou rété toujou anba grenn a-yo! Sa fwansé pè la, sé pèd Lagwadloup kivédi yo pè vwè pèp Gwadloup raché lendépandans a-y! Asi latè, pa tini enki zòt, nou pé woulé èvè dòt nasyon é sa sa ka fè zòt chyé!