On blòg an lang gwadloupéyen ka lyanné péyi Gwadloup èvè réjyon Karayib-la é kontinan afwiken-la.
Nou bizwen on Télé Tanbou osi!
Lanné 2011-la ka komansé èvè on zafè a bonbon yo vlé fè nou valé. On dénonmé "Radio Commerciale ou Coloniale Internationale" ka di nou pou débi a lanné-la onlo biten kay òkmanté konsidiré sé on biten nòmal. Alò kè nou ka konstaté sé plito pwofitasyon yo bizwen woumété si pyé kon avan! Pèp Gwadloup, fò zò véyatif, fò pa zò tonbé adan zatrap a makak! Gouvènè-la, Lirèl é Gillot ka kontinyé manti ban nou é pou sa yo ka sèvi èvè jounal, radyo é télé a-yo! Èvè on jounalis kon AJV ki sé mako a lirèl, ka maké enki manti asi on jounal ka pòté non a-y byen menm "Fwansmanti". Dènyé biten yo touvé pou fin toufé lèspri a gwadloupéyen, sé zafè a TNT-la. Gwadloupéyen poko réyalizé TNT-la sé on bèl zatrap padavwa sé on sistenm a télévizyon ola léta fwansé ka ba-w sa'y vlé pou vwè! Fouté pèp-la pli fon ankò adan sistenm a asimilasyon-la, anpéché-y réfléchi asi sistenm a pwofitasyon-la é anpéché-y palé asi pwoblèm a péyi-la!
E sé pou sa an ka di zòt, fò nou ni on radyo pli fò ankò kon Radyo Tanbou, on télé kon Télé Tanbou pa èkzanp é on jounal patriyotik ka parèt chak jou! Padavwa lèlmi ka woulé èvè kominikasyon. Touléjou i ka pwan lèspri a gwadloupéyen èvè manti! Opérasyon déchoukaj LKP mété anwout mwa pasé-la dwèt komansé adan larèl a kominikasyon-la. Sé sèl jan nou ké rivé bout èvè sistenm a pwofitasyon kapitalis é kolonyalis an péyi an-nou.
Zò ké di mwen sé on pwoblèm a lajan mé lè on moun vlé fè on biten, ayen pé ké anpéché-y fè-y!
Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!