Kòtdivwa, nou té ka atann li. Zanbi, awa!

Koup dafwik 2012 an péyi Giné Ekwatoryal é Gabon

 Si tout moun té ka atann Kòtdivwa an final-la, pa kont pon moun pa té ka vwè ékip nasyonal zanbi adan dènyé bout a konpétisyon-lasa.

Gras a Gervinho jwè a Arsenal an Anglètè, Kòtdivwa pwan méyè-la asi Mali (1-0). Apré 1992 é 2006, Kòtdivwa kay jwé on twazyèm final a koup dafwik. Zanbi li kant a-y kochi bèk a Gana 1-0. On ékip Gana ki té sòti vis-chanpyon an 2010 é ki té rivé menm lanné-la an kadèfinal a koup di mond-la an péyi Lafwik di Sid. Zanbi apré 1994 kay jwé on dòt final a konpétisyon afwikenn-lasa. Sé yonn adan sé dé méyè jwè a-y la Emmanuel Mayuka ki maké bi a viktwa-la.

Alò nou ka pwan mo dimanch pou final-la, Kòtdivwa-Zanbi. Kòtdivwa apré 1992, ké éséyé gannyé on dézyèm koup. Zanbi li poko jen gannyé-y. Gana é Mali ké bouwé pou twazyèm plas-la sanmdi.

 On bi majik a Gervinho. Gadé pon-la i fè anlè aryè-la!

 Zanbi ka soupwann moun!